КІТАП – РУХАНИ ҚАЗЫНА
Тәйімбет Көмекбаев ауылында рухани өмірді байытқан тағылымды шара өтті. Атап айтар болсақ, ақын Бекжан Сүлейменовтің «Ауылдың дәмі» және Имран Лепесов пен Қанжарбек Сұлтановтың «Ізетті іні, қадірлі құрдас» атты кітаптарының тұсаукесер рәсімі ұйымдастырылды.
Рухани мазмұны терең іс-шарада аудан әкімінің орынбасары Диас Молдабаев сөз сөйлеп: «Қай кезеңде болсын туған жерін ұмытпай, елдің рухани өміріне үлес қосып жүрген азаматтардың еңбегі әрдайым құрметке лайық. Бүгінгі кітаптардың жарық көруі – ауданымыздың және ауылымыздың мерейі деп білеміз. Өздеріңізге белгілі Мемлекет басшысы Қасым-Жомарт Тоқаев кітап оқуды дамыту мәселесіне ерекше көңіл бөліп келеді. Осындай еңбектер сол игі бастамалардың жүйелі көрінісі деп есептеймін» деп атап өтті.
Сондай-ақ еліміздің руханиятына үлес қосып отырған азаматтарға аудан әкімінің Құттықтауы табысталды.
Кешке қоғам қайраткерлері Алмас Алматов, Ырзақұл Нұртаев, Мұратбек Жиенбаев арнайы қатысып, кітаптардың лентасын қиды.
Салтанатты жиында мектеп оқушылары ақын Бекжан Сүлейменовтің шығармаларынан өлеңдер оқып, көрерменнің ыстық ықыласына бөленсе, жырауларымыз жыр жырлап, ұлттық рухты дәріптейтін термелер орындады.
«ҚТ» ақпарат
