БАЛАЛАРҒА ТАРТУ БОЛҒАН ТАҒЫЛЫМДЫ САПАР
1 маусым – Халықаралық балаларды қорғау күні қарсаңында Дүр Оңғар ауылындағы «Жаңажол» ЖШС-нің директоры, облыстық мәслихат депутаты Төлепов Орынбасар Өтепұлы ауыл балаларына ерекше тарту жасап, №107 орта мектептің үздік оқушыларын Қызылорда қаласына «Сыр елінің тарихы мен бүгінгі келбеті» атты бір күндік танымдық экскурсияға аттандырды.
Бұл тағылымды сапардың басты мақсаты – жас ұрпақты туған өлкенің бай тарихымен, мәдени мұраларымен, сәулетті ғимараттарымен және заманауи спорт нысандарымен таныстырып, олардың елге, жерге деген сүйіспеншілігін арттыру, рухани дүниесін байыту.
Экскурсия барысында оқушыларға барлық жағдай жасалып, жол шығыны, түскі және кешкі ас толықтай тегін ұйымдастырылды. Балалардың қуанышты жүздері мен шат күлкісі – осы игі істің ең үлкен жемісі болды.
