ҰЛТТЫҚ ӨНЕРДІҢ АЙШЫҚТЫ АЛАҢЫ

Іс-шараның басты мақсаты – ұлттық өнерді насихаттау, жас ұрпаққа дәстүрлі музыкалық мұраны заманауи әдістер арқылы үйретудің тиімді жолдарын талқылау және ұстаздар арасындағы шығармашылық байланысты нығайту болды. Қазақ халқының рухани қазынасы саналатын күй мен жыр-терменің тәрбиелік мәні, ұлт болмысын сақтаудағы орны кеңінен сөз етіліп, бүгінгі білім беру жүйесіндегі маңызы ерекше атап өтілді.

Тәжірибе алаңы барысында қатысушыларға мазмұнды ашық сабақтар ұсынылып, әр ұстаз өзінің кәсіби шеберлігі мен педагогикалық тәжірибесін ортаға салды. Домбыра сыныбының мұғалімі Ғабит Сәденов «Арынғазының күйі – «Арынғазы» тақырыбында ашық сабақ өткізіп, оқушының күй орындаудағы техникалық шеберлігі мен шығарманы терең түсінуіне бағытталған әдіс-тәсілдерін көрсетті. Сабақ барысында күйдің шығу тарихы мен орындаушылық ерекшеліктері жанжақты талданып, ұлттық өнерге деген қызығушылықты арттыруға басымдық берілді.

Жыр-терме класының мұғалімі Эльмира Мыңжанова Тұрмағамбет Ізтілеуовтің «Қамын ойла халқыңның» шығармасы негізінде тағылымды ашық сабақ өткізді. Сабақ барысында жырдың тәрбиелік мәні түсіндіріліп, халқымыздың даналық ойлары мен адамгершілік құндылықтары кеңінен насихатталды. Сонымен қатар, домбыра сыныбының мұғалімі Ақнұр Алимбаева халық күйі «Көк дөнен» тақырыбында ашық сабақ өткізіп, күйдің орындалу ерекшеліктерін, қағыс түрлері мен орындаушылық мәнерін кәсіби тұрғыда түсіндірді. Оқушының сахналық мәдениеті мен орындаушылық қабілеттерін дамытуға ерекше көңіл бөлінді.

Жыр-терме сыныбының мұғалімі Әділбек Сүлейменов «Кете Жүсіп – Ер жігіт» шығармасы аясында ұйымдастырған ашық сабағында ұлттық сөз өнерінің тағылымын дәріптеп, терме арқылы жастарды елжандылыққа, ерлікке, адамгершілікке тәрбиелеудің маңызын көрсетті. Ал домбыра сыныбының мұғалімі Гүлжаухар Сәденова ұлы күйші Құрманғазы Сағырбайұлының әйгілі «Адай» күйі бойынша өткізген ашық сабағында шығарманың тарихи мазмұны мен орындалу техникасына терең тоқталып, оқушының күйшілік шеберлігін шыңдауға бағытталған тиімді тәсілдерін ұсынды.

Іс-шараның ерекше бөлімдерінің бірі – Түркістан қаласынан арнайы шақырылған профессор, физика-математика ғылымдарының кандидаты Еркін Ақтаевтың «Инновациялық педагог: дәстүрлі өнер мен заманауи технологиялардың интеграциясы» тақырыбындағы мазмұнды лекциясы болды. Лектор қазіргі білім беру жүйесіндегі цифрлық технологиялардың мүмкіндіктерін кеңінен түсіндіріп, ұлттық өнерді оқытуда инновациялық платформаларды тиімді пайдаланудың жолдары туралы құнды ойпікірлерімен бөлісті. Сонымен бірге, дәстүрлі өнер мен жаңа технологияны ұштастыру арқылы оқушылардың қызығушылығын арттыру, шығармашылық қабілетін дамыту мәселелері қозғалды. Тәжірибе алаңы барысында ұстаздар өзара пікір алмасып, ұлттық өнерді оқытудағы өзекті мәселелер төңірегінде ой бөлісті. Мұндай тағылымды кездесулер ұстаздардың кәсіби дамуына серпін беріп қана қоймай, ұлттық мәдениетіміздің өркендеуіне де үлкен үлес қосатыны анық.

Қазақтың күйі мен жыр-термесі – ғасырлар бойы ұлттың рухани болмысын сақтап келе жатқан асыл мұра. Оны жас ұрпақтың бойына сіңіру – бүгінгі ұстаздардың маңызды міндеттерінің бірі. Осы бағыттағы тағылымды шаралар ұлттық өнердің өміршеңдігін айқындап, рухани құндылықтарымыздың болашаққа нық қадам басуына жол ашады. Іс-шара соңында ұйымдастырушылар тағылымы мол кездесуге қатысып, тәжірибе бөліскен барлық қонаққа шынайы ризашылықтарын білдіріп, ұлттық өнеріміздің мәртебесі биіктей беруіне тілектестік танытты.