Ардагер еңбегі – ұрпаққа үлгі
Ұлы Отан соғысы жылдары майдан даласында жаумен шайқас жүріп жатқанда, ел ішінде қалған қариялар, әйелдер мен балалар күн-түн демей еңбек етіп, Жеңісті жақындатуға өлшеусіз үлес қосты.Олар сол ауыр кезеңде майдандағы жауынгерлерді азық-түлікпен, киім-кешекпен және өзге де қажетті өнімдермен қамтамасыз етіп, Ұлы Жеңістің жақындатылуына зор үлес қосты. Бұл – ерлікпен пара-пар қажырлы еңбек еді.
«AMANAT» партиясы Байқоңыр филиалының төрағасы Еркін Рзалиев, филиалдың Атқарушы хатшысы Мақсат Есбенбетов және партия белсендісі Есен Қалиев тыл ардагері Құттықия Абибуллаевтың шаңырағына арнайы барып, құрмет көрсетті.
«Ардагерлерді ардақтайық» партиялық жобасы аясында өткен кездесуде ардагердің өмір жолы, соғыс жылдарындағы және одан кейінгі еңбегі кеңінен айтылып, Жеңіске қосқан үлесі ерекше атап өтілді. Сондай-ақ сол кезең туралы естеліктер тыңдалып, бүгінгі бейбіт өмірдің құндылығы мен тәуелсіздіктің қадірі жөнінде тағылымды ойлар ортаға салынды.
Кездесу барысында ардагерге жылы лебіздер білдіріліп, хал-жағдайы сұралды. Өз кезегінде Құттықия ата көрсетілген құрметке ризашылығын білдіріп, елдің амандығы мен тыныштығын тілеп, ақ батасын берді.
Тыл ардагерлерінің қажырлы еңбегі – бүгінгі бейбіт өмірдің берік негізі әрі кейінгі ұрпаққа үлгі болатын тағылымды тарих.
