МЕРЕЙІ ҮСТЕМ МАМАН

Осындай өз ісіне адал, руханияттың жанашыры болып жүрген жандардың бірі – Айнұр Алдабергенқызы. Ол – Жосалы кентінің тумасы. Осындағы №121 мектептің түлегі. Мектеп қабырғасында жүріп-ақ кітапқа деген ерекше сүйіспеншілігімен көзге түскен ол өз болашағын кітапхана ісімен байланыстыруды жөн көреді. Жан қалауын таңдаған ол «Кітапхана ісі» мамандығын тәмамдап, бүгінде №26 мектепте 10 жылдан бері табысты қызмет етіп келеді.

Өмірін кітаппен байланыстырған Айнұр Алдабергенқызының еңбегі елеусіз емес. Ол оқушылардың кітапқа деген қызығушылығын арттыру мақсатында түрлі іс-шаралар ұйымдастырып, кітапхананы тек оқу орны ғана емес, рухани орталыққа айналдыруға күш салып келеді. Мектеп кітапханашыларымен бірлесіп білім ордасында әдеби кештер, кітап көрмелері, танымдық кездесулер жиі өткізіліп тұрады.

Кәсіби шеберлігі мен ізденімпаздығының нәтижесінде кітапханашы бірнеше мәрте марапатқа ие болды. Қызылорда облыстық білім басқармасы басшысының «Кітапханашылар күніне» орай Алғыс хатымен марапатталса, «Алматы кітап» баспасының «Topiq» білім беру платформасын белсенді қолданып, цифрлық білім беру технологияларына қызығушылық танытқаны үшін мектеп кітапханасы арнайы дипломға ие болған.

Былтыр кітапханашылар күніне орай өткен республикалық деңгейдегі байқауда да Айнұр Алдабергенқызының еңбегі жоғары бағаланды. Қазақстан Республикасы Оқу-ағарту министрлігінің Республикалық ғылыми-педагогикалық кітапханасы мен «Көкжиек-Горизонт» баспасы бірлесіп ұйымдастырған ІІІ республикалық «Кітап әлемі – кадрда» фотобайқауында «Шексіз кітап – Книга без границ» номинациясы бойынша І дәрежелі дипломмен марапатталды. Кітапханашының айтуынша, бұл жетістіктер – тек жеке еңбектің ғана емес, ұжымдық қолдаудың нәтижесі.

– Қазіргі заманда кітапханашы болу – үлкен жауапкершілік. Себебі біз тек кітап беріп қана қоймаймыз, оқушының ой-өрісін кеңейтіп, дұрыс бағыт-бағдар көрсетуге тырысамыз. Әсіресе цифрлық технологиялар дамыған уақытта кітапхананың да жаңа форматқа көшуі маңызды. «Topiq» сияқты платформалар арқылы балалардың білімге деген қызығушылығын арттыруға болады. Мен үшін ең үлкен марапат – оқушылардың кітапқа, кітапханаға қайта оралуы, – дейді Айнұр Алдабергенқызы.

Шынында да, бүгінгі кітапханашы – заман көшінен қалмай, дәстүр мен жаңашылдықты қатар алып жүрген жандар. Олар кітап оқуды жаңа технологиялар арқылы танытуға бар күшжігерін салуда. Қалайда кітаптың құнын арттыруға еңбек етуде. Түптеп келгенде, кітап – мәңгілік. Ал сол мәңгіліктің шамын сөндірмей, келер ұрпаққа жеткізіп жүрген осындай кітапханашылар еңбегі әрдайым құрметке лайық.