БАЙҚОҢЫРДА ЖАҢАРУ КҮНІНЕ ОРАЙ ТАЗАЛЫҚ АКЦИЯСЫ ҰЙЫМДАСТЫРЫЛДЫ
Қызылордада партияның Байқоңыр филиалы Наурызнама онкүндігі аясындағы ерекше күндердің бірі – Жаңару күніне орай «Таза бейсенбі» экологиялық акциясын Байқоңыр қалалық көпбейінді ауруханасының аумағында жүргізді.
Медицина қызметкерлері үшін тазалық – күнделікті жұмыстың ажырамас бөлігі. Сондықтан сала өкілдері «Таза бейсенбі» акциясына ерекше жауапкершілікпен қарап, үлгі боларлық белсенділік танытты. Адам жанына араша түсіп жүрген ақ халаттылар «Таза әрі ұқыпты орта – науқастардың сауығуына да оң әсер етеді», - дейді.
Акцияны ұйымдастырушы «AMANAT» партиясы Байқоңыр филиалының атқарушы хатшысы Мақсат Есбенбетовтың айтуынша, мұндай экологиялық шаралар қоғамда тазалық мәдениетін қалыптастыруда маңызды рөл атқарады.
«Жаңару күні – Наурызнама онкүндігі аясындағы ерекше күндердің бірі. Бұл күн – тазалыққа, ізгілікке және жақсы өзгерістерге ұмтылудың белгісі. Сондықтан бүгінгі экологиялық акцияның дәл осы күнмен тұспа-тұс келуі үлкен мағынаға ие. «Таза бейсенбі» – бұл тек бір күндік шара емес, ол тұрғындардың қоршаған ортаға деген жанашырлығын арттырып, ортақ жауапкершілікті нығайтатын маңызды бастама. Әр азамат өз ауласынан бастап тазалықты сақтаса, қаламыздың келбеті одан әрі көркейе түседі»,- дейді ол.
Осындай игі шаралар арқылы қоғамда экологиялық мәдениетті қалыптастыру, тазалыққа деген жауапкершілікті арттыру көзделеді. Жаңару күнімен тұспа-тұс келген бұл акция – тек табиғатты емес, адам санасын да жаңғыртуға бағытталған маңызды қадам.
«Таза бейсенбі» акциясы алдағы уақытта да жалғасын тауып, әрбір азаматты ортақ іске жұмылдыруға өз септігін тигізе беремек.
