"ТАЗА БЕЙСЕНБІ": БАЙҚОҢЫРЛЫҚТАР ТАЗАЛЫҚ АКЦИЯСЫНА АТСАЛЫСУДА
Қызылорда өңірінде Мемлекет басшысының "Таза Қазақстан" жалпыұлттық бастамасы аясында "Таза бейсенбі" акциясы жалғасуда.
Бүгін "AMANAT" партиясы Байқоңыр филиалының ұйымдастыруымен Байқоңыр қаласындағы Абай көшесінің аумағы қардан тазартылды. Игі іске партия филиалы Саяси кеңесінің мүшелері, бастауыш партия ұйымдарының төрағалары және жастар, жалпы 30-ға жуық азамат үлес қосты.
"Өткен жылы да партияластарымыздың қолдауымен көшелерде, ескерткіштер маңы мен саябақтарда тазалық жұмыстары қарқынды жүргізілді. Биылғы жылы "Таза бейсенбі" акциясы аясында ұйымдастырылып отырған тазалық жұмыстарына қатысушы азаматтарға алғыс білдіреміз. Бұл акция арқылы әрбір қала тұрғыны ортақ үйіміз – шаһарымызды ұқыптылықта ұстап, тазалық мәдениетінің дамуына себепші болары анық", - деді партияның Байқоңыр филиалының Атқарушы хатшысы Мақсат Есбенбетов.
Жалпы жоба аясындағы тазалық жұмыстары жыл соңына дейін жалғасатын болады.
