МАҢЫЗДЫ ТЕТІК, АЗАМАТТЫҚ ЖАУАПКЕРШІЛІК

Еліміз үшін маңызды кезең басталғалы тұр. Конституциямызға енгізілетін өзгерістер – бұл жай ғана құқықтық түзетулер емес, мемлекетіміздің болашақ даму бағытын айқындайтын тарихи қадам.

Ата заң – елдігіміздің айнасы, бірлігіміздің негізі, тәуелсіздігіміздің темірқазығы. Сондықтан оған енгізілетін әрбір өзгеріс – бүкіл қоғам үшін маңызды деп есептеймін. Бұл – әділетті, жауапты әрі тұрақты мемлекет қалыптастыру жолындағы маңызды шешім.

Осыған орай 15 наурыз күні республикалық референдум өтеді. Референдум өткізу – халық пен билік арасындағы сенімді нығайтудың бір жолы. Өйткені ел тағдырына қатысты ірі шешімдер тек жоғары мінберде емес, қарапайым халықтың таңдауымен бекітілгенде ғана оның салмағы арта түседі. Референдум – халық еркінің көрінісі, мемлекет дамуының жаңа кезеңіне қадам басудың маңызды тетігі.

Бұл – ел өміріндегі жауапты кезеңдердің бірі болмақ. Ол – қоғамдық келісім мен бірлікті нығайтуға, азаматтардың белсенділігін арттыруға, мемлекет пен халық арасындағы сенімді күшейтуге мүмкіндік береді.

Референдумға қатысу – әр азаматтың конституциялық құқығы ғана емес, азаматтық жауапкершілігі. Өз таңдауын жасау арқылы адам елдің ертеңіне ықпал етеді. Бейжай қалу – болашаққа қатысты пікір білдіруден бас тарту деген сөз. Сондықтан қоғам болып маңызды мәселелерге үн қосу – өркениетті елге тән қасиет.

15 наурыз – ел болашағы үшін маңызды күн. Белсенділігіміз бен азаматтық жауапкершілігіміз мемлекетіміздің ертеңін айқындайды.