ЕЛ БІРЛІГІНЕ БАСТАР МАҢЫЗДЫ ЖИЫН

Биылғы Ұлттық құрылтайдың Қызылорда қаласында, яғни біздің облыста өткізілуі барша өңір жұртшылығы үшін зор мәртебе әрі үлкен жауапкершілік болды. Бұл – ел дамуының стратегиялық бағыттарын айқындайтын, қоғам мен мемлекет арасындағы өзара сенімге негізделген маңызды қоғамдық-саяси алаңның Сыр елінде ұйымдастырылуы.

Жалпы Қызылорда – қазақ мемлекеттілігінің қалыптасу тарихында айрықша орны бар қасиетті өңір. Бір кездері ел астанасы болған бұл қалада ұлттың тағдырын айқындаған талай тарихи шешімдер қабылданды. Сондықтан Ұлттық құрылтайдың Сыр елінде өтуі тарихи сабақтастықты жаңғыртып, ұлттық бірегейлікті нығайтуға бағытталған маңызды қадам деп білеміз. Бұл шешім халқымыздың өткені мен бүгіні арасындағы рухани байланысты тереңдете түсетіні сөзсіз.

Ұлттық құрылтай – қоғамдағы өзекті мәселелер ашық талқыланатын, ел дамуының басым бағыттары айқындалатын тиімді диалог алаңы. Құрылтай шеңберінде әлеуметтікэкономикалық даму, өңірлік саясат, ауыл мәселелері, жастар тәрбиесі, адами капиталды дамыту, сондай-ақ ұлттық құндылықтарды сақтау мен жаңғырту сияқты маңызды тақырыптар көтерілді. Бұл – халықтың үнін естіп, елдің ертеңіне қатысты ортақ шешімдер қабылдауға мүмкіндік беретін маңызды институт.

Мемлекеттік қызмет жүйесі үшін Ұлттық құрылтайда көтерілген бастамалар мен ұсыныстарды сапалы әрі уақытылы іске асыру – халық сенімін арттырудың басты тетігі. Ардагерлер қауымы ретінде біз елдегі тұрақтылықты, қоғамдық келісімді және әділеттілікті нығайтуға бағытталған реформаларды қолдаймыз. Құрылтайда айтылған ой-пікірлер мен ұсыныстар нақты істерге ұласып, халықтың тұрмыс сапасын арттыруға қызмет етуі тиіс.

Ұлттық құрылтайға әртүрлі сала өкілдерінің, оның ішінде зиялы қауым, ардагерлер, жастар, азаматтық қоғам мүшелерінің қатысуы ортақ жауапкершілікті күшейтеді. Бұл мемлекет пен қоғам арасындағы сенімді нығайтып, ел бірлігін бекемдей түседі. Осындай маңызды диалог алаңы арқылы халықтың ойы ескеріліп, ұлттық мүдде бірінші орынға қойылады.

Ұлттық құрылтай – елдің бірлігі мен тұрақты дамуына қызмет ететін, болашаққа бағыт-бағдар беретін маңызды қоғамдық институт. Ардагерлер қауымы құрылтайда көтерілген әрбір тақырып ел дамуына нақты үлес қосады деп нық сенім білдіреді.