ҚАРМАҚШЫ АУДАНЫНДА МӘДЕНИЕТ САЛАСЫНЫҢ ДАМУЫ ЖАНДАНЫП КЕЛЕДІ
Мемлекет басшысы мәдениет саласын әрдайым қолдауда, бұл бағыттағы жұмыстар ауданымызда да жүйелі жүргізілуде. Қармақшы ауданында 34 мәдениет мекемесі халыққа қызмет көрсетіп, 120 үйірме жұмыс істейді. 2025 жылы үйірмелердің қатысушылары халықаралық, республикалық және облыстық 86 байқауға қатысып, жүлделі орындарды иеленді.
Тұрғындардың мәдени-рухани дамуын арттыру мақсатында 2025 жылы ауданда 2 855 мәдени іс-шара ұйымдастырылды. Ұлы Жеңістің 80 жылдығына орай Кеңес Одағының Батыры Тәйімбет Көмекбаевқа арналған мемориалдық белгі ашылып, мерекелік танымдық конференция өткізілді. Сонымен қатар, Қызылорда қаласының астана болғанына 100 жыл толуына арналған облыстық өнер байқауында Қармақшы ауданының ұжымдары І орынды жеңіп алды.
2025 жылы тарихи-мәдени мұраларды сақтау бағытында аудан аумағындағы 15 ескерткішке 8,8 млн теңге қаражат бөлініп, құжаттандыру жұмыстары аяқталды. Мәдениет пен спорт ұйымдарының материалдық-техникалық базасын нығайту үшін 50,3 млн теңге қаралып, мәдениет үйлері мен спорт кешендеріне LED экрандар мен музыкалық аппаратуралар сатып алынды.
