КАССАЦИЯЛЫҚ СОТ – ЗАҢ ҮСТЕМДІГІН ҚАМТАМАСЫЗ ЕТУДІҢ ЖАҢА КЕЗЕҢІ

Сот жүйесі – мемлекеттің әділдікке деген көзқарасын айқындайтын басты институттардың бірі. Соңғы жылдары елімізде жүргізіліп жатқан сот реформалары осы бағыттағы өзгерістердің ауқымын көрсетеді. Соның ішінде Жоғарғы Сот жанынан жеке Кассациялық соттың құрылуы – тарихи маңызы бар шешім.

Бұл – азаматтардың құқықтары мен бостандықтарын қорғауда қосымша кепілдік беретін, сот төрелігінің сапасын арттыруға бағытталған батыл қадам.

Кассация – сот ісін жүргізудің ең жоғарғы сатысы. Мұнда басты мақсат – заң нормаларының біркелкі және дұрыс қолданылуын қамтамасыз ету, сот актілеріндегі елеулі қателіктерді жою. Бұл сатыда жаңа дәлелдер қаралмайды, тек сот шешімінің заңдылығы мен негізділігі тексеріледі.

Қоғамдағы тұрақтылық пен мемлекеттің дамуы заңүстемдігіне байланысты. Кассациялық соттың құрылуы – осы іргетасты нығайтуға бағытталған нақты қадам. Ол сот жүйесіне деген сенімді күшейтіп қана қоймай, азаматтар мен мемлекет арасындағы сенімді диалог орнатуға мүмкіндік береді.

Кассациялық соттың қызметі – әділдік пен заңдылықты қамтамасыз етудің жаңа тетігі. Байқоңыр қалалық сотының қызметкері ретінде мен бұл өзгерісті сот жүйесінің дамуындағы үлкен жетістік деп санаймын. Бұл – азаматтардың мүддесін қорғау жолындағы әділдікке бастайтын сенімді көпір.