КАССАЦИЯЛЫҚ СОТТЫҢ ҚҰРЫЛУЫ – ӘДІЛДІККЕ ЖЕТУДІҢ ЖАҢА БЕЛЕСІ

Қазақстан Республикасының сот жүйесі жыл сайын жаңарып, заман талаптарына сай жетіліп келеді. Бұл – Ел Президентінің бастамасымен және құқықтық саясаттың үздіксіз дамуы нәтижесінде іске асып жатқан жүйелі реформалардың жемісі. Соның жарқын дәлелі – Жоғарғы Сот жанынан дербес Кассациялық сот алқасының құрылуы. Бұл қадам – әділдікке қол жеткізу тетіктерін күшейтіп, азаматтардың құқықтары мен бостандықтарын қорғауда жаңа мүмкіндіктер ашатын маңызды бастама.

Кассациялық саты – сот жүйесінің ең жоғарғы буындарының бірі. Мұнда сот шешімдері заңдылық тұрғысынан қайта қаралып, құқық қолдану тәжірибесіндегі біркелкілікті сақтау басты назарда болады. Бұл – дауды қайта қарау емес, сот төрелігінің сапасын арттыруға бағытталған заңдық сүзгі іспетті.

Бұған дейін кассациялық істер Жоғарғы Сот құрамында қаралса, енді арнайы құрылған судьялар құрамы бұл міндетті дербес атқарады. Мұндай мамандану – сот шешімдерінің сапасын арттырып, құқық нормаларының біркелкі қолданылуын қамтамасыз етеді. Кассациялық сот тек заң нормаларының дұрыс қолданылғанын тексеріп, процестегі елеулі қателіктерді түзетуге бағытталады.

Құқықтық мемлекеттің басты қағидаты – заң үстемдігі. Кассациялық соттың дербес құрылуы – әділдік қағидатын күшейтіп, халықтың сот жүйесіне деген сенімін арттырады. Өйткені әділ сот төрелігі – қоғамның тұрақтылығы мен мемлекеттің дамуының кепілі.

Кассациялық соттың құрылуы – әділдік пен заңдылықты қамтамасыз етудің жаңа мүмкіндігі. Бұл – азаматтардың құқықтарын қорғау жолындағы сенімді қадам. Байқоңыр қалалық сотының қызметкері ретінде мен бұл реформаның ел өмірінде оң нәтижелер беріп, сот жүйесінің сапасын жаңа деңгейге көтеретініне толық сенемін.