АТА ЗАҢ- ЕЛ БІРЛІГІНІҢ НЕГІЗІ
30 тамыз — еліміздің негізгі Заңы мен мемлекеттіліктің мызғымас негізіне айналған Конституция күні. Осы айтулы мереке аясында аудандық Мәдениет үйінде «30 тамыз – Қазақстан Республикасының Конституциясы күніне» арналған салтанатты шара өтті.
Биылғы мерекенің орны ерекше — Ата Заңымыздың қабылданғанына 30 жыл толып отыр. Осы тарихи белеске арналған іс-шара Мемлекеттік Туды салтанатты түрде сахнаға шығару және Қазақстан Республикасының Әнұранын орындаумен басталды.
Салтанатты кеште ауданымыздың түрлі саладағы жетістіктері мен даму көрсеткіштері жайлы арнайы бейнеролик ұсынылды. Онда Конституцияның ел дамуындағы рөлі мен оның қоғам өміріне қосқан үлесі кеңінен көрініс тапты.
Шара барысында аудан әкімі Жандос Еркінбек сөз сөйлеп, жиналған жұртшылықты мерекемен құттықтады. Өз сөзінде:
«Ата Заңымыз – «Жаңа Қазақстан» идеясын жүзеге асыру жолындағы барлық реформалардың арқауы. Бүгінгі күні Мемлекет басшысының бастамасымен елде әділдік пен заң үстемдігін орнату, халыққа тиімді қызмет көрсететін ашық мемлекеттік жүйе қалыптастыру бағытында ауқымды өзгерістер жүзеге асырылуда.
Ата Заңға сүйене отырып, өткен 30 жылда еліміздің әр түкпірінде, оның ішінде жүз шайырдың мекені, киелі Қармақшы мекені Мемлекет басшысы мен Облыс әкімінің ерекше қолдауымен қарқынды дамып келеді.
Жыл басынан бері ауданымызда экономиканың барлық негізгі бағыттарында оң серпін қалыптасып, әр саладағы көрсеткіш 100%-дан асып отыр. Осының нәтижесінде жоспарлы жобалар жүзеге асып, халық игілігіне арналған инфрақұрылым нығайып келеді.
Бүгінде аудан халқының 78 пайызы табиғи газдың игілігін көруде. Қазіргі таңда Дүр Оңғар ауылына газдандыру жұмыстары жүргізіліп жатса, келер жылы Төребай би, Иіркөл ауылдарына жалғастыруды жоспарлап отырмыз.
Кезекте тұрған халықтың әлеуметтік осал топтарына, жалғыз баспанасы апатты деп танылған азаматтарға әлі де тұрғын үймен қамтамасыз ету жалғасуда.
Бұдан бөлек, жол инфрақұрылымын жақсартып, тұрғындарға қолайлы жағдай жасау мақсатында да ауданымызда бірқатар көшелерге күрделі жөндеу жұмыстары жүргізілуде. Нәтижесінде аудандық маңыздағы автомобиль жолдарының жағдайы 100% жақсы көрсеткішке қол жеткізді.
Сонымен қатар, көлік-логистика саласында да жақсы жаңалықтарға қол жеткізудеміз. Үлкен әрі маңызды бастамалардың бірі - Облыс әкімінің тапсырмасына сәйкес жолаушыларға қолайлы жағдай жасау бағытында құны 1 млрд теңгеден асатын Жосалы және Төретам кентіндегі теміржол вокзалдарына қазіргі уақытта күрделі жөндеу жұмыстары жүргізілуде. Сондай-ақ теміржол өткелі де(переезд) салынуға жақын.
Бұл игі бастамалардың барлығы – Ата Заңымызда бекітілген қағидаттар аясында жүзеге асуда»,- деді аудан басшысы өз сөзін қорытындылай келе.
Мерекелік кеш аудан өнерпаздарының орындауындағы «Туған жер» тақырыбындағы патриоттық әндермен жалғасып, көрерменге рухани әсер сыйлады. Шара туған жерге арналған жүрекжарды өлең жолдарымен қорытындыланып, елге деген сүйіспеншілік сезімін ұялатты.
Қазақстан Республикасының Конституциясы күні — еліміздің тұрақтылығы мен бірлігінің айқын көрінісі. Бұл күннің мәні мен маңызы әрқашан жоғары бағаланып, ұрпақтан-ұрпаққа жалғаса бермек.
