ЖҮРЕКПЕН ТАҢДАҒАН ЖОЛ
Бұл сұрақты өзіме жиі қоямын. Болашағым қандай болмақ? Қайда бара жатырмын? Қандай адам болып қалыптасамын? Қазіргі таңда мен журналистика мамандығында оқып жүрмін. Бұл мамандықты саналы түрде таңдадым. Себебі сөздің күші мен шындықтың мәні мені әрқашан баурап келді. Журналист – жай ғана ақпарат таратушы емес, ол – халық пен қоғам арасындағы көпір.
Мен болашағымды осы салада елге пайдасы тиетін, шыншыл әрі әділ журналист ретінде елестетемін. Қоғамдағы мәселелерге бейжай қарамайтын, шындықты жасырмай, оны сауатты жеткізе алатын тұлға болғым келеді. Бірақ ол жол оңай жол емес екенін білемін. Қиындығы мен сыны қатар жүреді. Қазірдің өзінде кей сәттерде адамдарға шынайы қарап, адал ниетпен сенгенім үшін көңілім қалған тұстар болды. Бірақ бұл мені әлсіз етпейді, керісінше шыңдайды.
Болашақ – бүгінгі еңбектің нәтижесі. Қазір оқып жүрген әрбір сабағым, жазған әрбір мақалам, көрген әрбір тәжірибем – менің ертеңгі өмірімнің іргетасы. Кейде шаршаймын, кейде күмәнданамын, бірақ ішкі сенімім мені алға жетелейді. Себебі мен жүрекпен таңдаған жолдамын.
Болашақта өз орнымды табатыныма сенемін. Тек журналист қана емес, ең алдымен – жақсы адам болғым келеді. Шындықты айтуда қорықпайтын, бірақ оны жүрекпен жеткізе білетін мейірімді жан болу – менің басты армандарымның бірі.
Менің болашағым – сенім, еңбек және адалдықпен өрілетін жол. Сол жолмен жүріп келемін. Алдағы күндер не әкелсе де, мен оған дайынмын. Себебі мен өз жолымдамын.
Шұғыла СЕРІКБАЙҚЫЗЫ
