КӘМЕЛЕТКЕ ТОЛМАҒАНДАР МӘСЕЛЕСІ БОЙЫНША КОМИССИЯ ОТЫРЫСЫ ӨТТІ
Аудан әкімінің орынбасары Самат Қыдырбекұлының төрағалығымен кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті. Жиынға комиссия мүшелері, құқық қорғау органдарының басшылары, мектеп директорлары мен білім бөлімінің өкілдері қатысты.
Отырыста балалардың жазғы демалыс кезеңінде қауіпсіздігін қамтамасыз ету, қаңғыбастықтың алдын алу және демалысты тиімді ұйымдастыру жолдары қаралды. Осы бағытта аудандық төтенше жағдайлар және білім бөлімінің басшылары баяндама жасады.
Мектеп директорлары оқу орындарындағы тәртіп, мектепке бармау себептері, тұрмысы төмен отбасылардан шыққан балалардың жай-күйі және құқық бұзушылықтың алдын алу шаралары туралы мәлімет берді.
Аудан әкімінің орынбасары ата-анамен байланысты нығайту, оқушылардың бос уақытын тиімді пайдалану, мектеп инспекторларымен бірлескен жұмысты жүйелеу қажет екенін айтып, білім беру мекемелері мен жергілікті органдарға нақты тапсырмалар жүктеді.
