ҰМЫТЫЛМАС ЕРЛІК, ӨШПЕС ДАҢҚ
Ұлы Жеңіс күні- қасиетті де қастерлі мереке. Көк аспанның астында, бейбіт өмір мен көк байрағымыздың мәңгілік желбіреуі үшін орасан үлес қосқан ер азаматтар мен ардагерлерді құрмет тұту- бүгінгі ұрпақтың басты парызы. Ұлы Отан соғысында қаза тапқан батыр жауынгерлерімізді үлгі тұту мақсатында аудан әкімі Жандос Еркінбек “Тағзым” алаңында 9 мамыр- Ұлы Жеңіс күніне арналған салтанатты шараға қатысып, жұртшылықты маңызды мерекемен құттықтады.
Аудан әкімі өз сөзінде- “Бұл күн жанқияр ерліктің, еңселі елдіктің рухы өрлеп, Жеңіс жалауы желбіреген күн. Жеңіс – батылдық пен қаһармандықтың, халқымыздың бірлігінің беріктігі мен қайсар рухының мерекесі. Біз Ұлы Отан соғысының оқ бораған даласында қаза тапқандардың рухтарына және тылда ерен еңбектің үлгісін көрсеткен аталарымыз бен апаларымызға бас иіп, тағзым етеміз”,- деп халық қаһармандарының жалынды рухтарын ерекше атап өтті.
Одан соң, “Мәңгілік алау” монументіне гүл шоқтарын қойып, сұрапыл соғыста ерлікпен қаза тапқандарды бір минут үнсіздікпен еске алды.
Салтанатты шараны аудан өнерпаздары майдангерлердің жалынды рухтарын бейнелейтін патриоттық әндерімен қорытындылады.
