Аудан әкімі Жеңіс күнімен құттықтады

ҚЫМБАТТЫ ЖЕРЛЕСТЕР!

Сіздерді 9 мамыр – Ұлы Жеңістің 77 жылдығы мерейлі мерекесімен шын жүректен құттықтаймын! Бұл күн жанқияр ерліктің, еңселі елдіктің рухы өрлеп, Жеңіс жалауы желбіреген күн. Жеңіс – батылдық пен қаһармандықтың, халқымыздың бірлігінің беріктігі мен қайсар рухының
мерекесі. «Ер басына күн туып, етігімен қан кешкен» сұрапыл жылдардағы батыр майдангерлеріміздің өлшеусіз ерліктері мәңгі ұмытылмайды. Ерліктің ерен үлгісін танытып, бүгінгі бейбіт күн сыйлаған майдангерлерімізді әрдайым ардақтап, болашақ ұрпақ алдында мақтан етеміз.

Құрметті аудан тұрғындары!

Қармақшы жерінен майдан шебіне аттанып, ел қорғаған батыр бабаларымыздың, ардақты майдангерлеріміздің және тыл ардагерлеріміздің
өшпес ерлігі біздің мәңгі есімізде сақталады. Тәуелсіздік тұғырының берік, еңсеміздің биік болуы, еліміздің өркендеуі осынау мерекенің жемісі. Бүкіл халық жадындағы қастерлі мереке – Ұлы Жеңіс күні құтты болсын! Әр отбасына ырыс-береке, елімізге бейбітшілік тілеймін!

Ізгі тілекпен,
аудан әкімі Әділбек ЕРСҰЛТАНОВ