БАЛА БОЛАШАҒЫНЫҢ БАҒБАНЫ

Сәулекүл апай ауданға қарасты Ақтөбе ауылының тумасы. Осындағы мектепті тәмамдаған соң, сол уақыттың талабы бойынша шаруашылықта сауыншы болып жұмыс істеп, 1981 жылы Қызылордадағы Гоголь атындағы педагогикалық институтында 8 ай даярлық курста оқып, 1982 жылы өзі қалаған физика-мамематика мамандығы бойынша оқуға түседі. Жоғары білімді меңгерген жас маман туған ауылына келіп, осындағы №109 орта мектепке мұғалім болып жұмысқа орналасады. 17 жыл абыроймен ұстаздық қызметті атқарған білікті маман 2005 жылы ауылдағы №16 «Перизат» мемлекеттік бөбекжайбақшасына басшылық қызметке ауысады. Болашақ үшін маңызы зор осы қызметті жауапкершілікпен атқарып жүргеніне де 20 жыл толған. Кейіпкеріміз басшылық ететін балабақша бүлдіршіндерді заман талабына сай тәрбиелеуде елеулі үлес қосып келеді.

Бөбектер мекенінде бүгінде 3 топта, 75 бала тәрбиеленуде. Бүлдіршіндерге патриоттық, эстетикалық, адамгершілік тәрбие беру, өз ой-пікірін білдіре алатын, салауатты өмір салтына сай, болашақтың тірегі болатын дені сау, жан-жақты азамат етіп тәрбиелеуде балабақшада білікті мамандар қызмет етеді.

– Мектепке дейінгі тәрбие мен оқытудың үлгілік оқу бағдарламасын басшылыққа алып, әр баланың қызығушылығын, ерекшеліктері мен қажеттіліктерін ескере отырып, жалпы адами және ұлттық құндылықтар негізінде оларды толыққанды дамыту мен әлеуетін ашу мақсатында жұмыс жүргізіліп келеді. Рухани адамгершілік құндылықтың негізі – халық педагогикасынан бастау алады. Оның бірнеше ғасырлық тәжірибесіне сүйене, рухани құндылықты сақтай отырып, болашақ ұрпақты еңбекке, қоғамдық ортаға дайындау, имандылық қасиеттерін бала бойына сіңіру әрбір педагогке жүктелген. Сондықтан да заман талабынан кеш қалмай жаңашылдыққа, инновациялық өзгерістерді күнделікті тәрбиелеу – білім беру процестерінде ұйымдастыру балабақша педагогтеріне қойылатын басты талаптардың бірі. Сондай-ақ бізде «Аталар», «Аналар» мектебі жұмыс істейді. Әрбір ата-анамен тығыз байланысып, бала болашағының жарқын болуына еңбек етудеміз, – дейді балабақша меңгерушісі.

Осы орайда заңғар ақын Мұхтар Шахановтың мына сөзі ойға оралады. «Бала жүрегі – кішкентай күйсандық. Ол күйсандықтың кілтін тапсаң ғана ашылады. Мұғалімнің қолында әр кезде сол кілт жүруі керек». Осы ұстанымды басшылыққа алып, өзінің еңбек жолында әр баланың көңіліне жол таба білген, алдындағы шәкірті мен бүлдіршінін жеке тұлға ретінде көріп, жауапты қызметкер, білікті басшы бола білген жанның өмірлік ұстанымы да айқын.

– «Ең дәмді деп татқаның – өз еңбегіңмен тапқаның. Сонда ғана еңбегің – дәулетің, беделің – сәулетің бола алады. Сонда ғана шыраққа айнала аласың. Жанған шырақ жарық берер, жарық берген шырағыңды халық көрер» деп Әйтеке бидің ел басқарған азаматтарға айтқан даналық сөзі бар. Саналы ғұмырымда осы сөзді санама құйып келемін. Өзімнен кішілерге де осы сөзді насихат етемін. Балаларыма да адалдық бірінші орында екенін әкесі екеуміз ұғындырып келеміз, – дейді Сәулекүл Жабаева.

Ата-ананың бойындағы тәлім-тәрбие, еңбекқорлық пен адалдық, білімге, ғылымға деген құштарлық балаларына дарып, бұл отбасында бақ пен береке орнаған. 4 перзент тәрбиелеп, бүгінде олардан 6 немере сүйген жанұяның жетістігі мол. Олардың әр жетістігіне ана жүрегі қуанып, әке көңілі ризашылық білдіріп отырады. Өмір жолында мансап пен міндетті, қызмет пен отбасыны қатар алып жүріп, бірде құлап, бірде сүрінсе де қарапайым, байсалды қалпынан таймайтын, қайсар, ақылды, дана әйел, танысқан әрбір жанның жүрегіне жылы шуақ төгетін Сәулекүл апайдың өмір белестері осындай. Білікті басшы, ұлағатты ұстаз ел болашағын тәрбиелеуде тынымсыз күндер мен түндерді артқа тастап, абырой биігінде келеді. Оның жеткен жетістігі, шыққан асуынан гөрі әлі қоғамға берері мол.