АБЫРОЙЛЫ ЕҢБЕКПЕН ҚҰРМЕТТІ ЗЕЙНЕТКЕ
Зейнетке шығу – әр адамның өміріндегі маңызды кезеңдердің бірі. Жастық шағын еңбекпен өткізген әр адамның құрметпен зейнетке шығуы абырой, кейінгіге үлгі боларлық дәреже. Жақында аудан әкімі Жандос Еркінбек аудандық санитарлық-эпидемиологиялық бақылау басқармасының басшысы Гүлнар Мәлікқызын зейнет жасына толуымен құттықтады.
Аудан басшысы Гүлнар Мәлікқызының денсаулық сақтау саласындағы ұзақ жылғы еңбегін атап өтіп, 40 жылға жуық ауданымыздың санитарлық-эпидемиологиялық қауіпсіздігін қамтамасыз етуге қосқан үлесі үшін алғысын білдірді. Кәсібилігі мен жауапкершілігі арқасында саланың дамуына сіңірген еңбегін ерекше атап өтті.
Жиын барысында адал еңбек жолында абыройлы еңбекпен зейнетке шығып жатқан Гүлнар Мәлікқызына аудан әкімдігі мен аудандық мәслихаттың бірлескен шешімімен ауданның ең жоғары марапаты – «Құрмет грамотасы» табысталды. Сондай-ақ аудандық мәслихат төрағасы Әділ Қошалақов, аудандық ардагерлер кеңесінің төрағасы Асқар Мереков және аудандық әйелдер кеңесінің төрайымы Гүлжауһар Раева құттықтау сөз сөйлеп, мерейгер еңбегіне ризашылығын білдіріп, жылы лебізін жеткізді.
Іс-шарада Гүлнар Мәлікқызы көрсетілген құрметке алғысын айтып, әріптестеріне ризашылығын білдірді. Ол өңірдің санитарлық-эпидемиологиялық ахуалын жақсартуға бағытталған жұмыстың әрі қарай да өз жалғасын табатынына сенім білдіріп, саладағы әріптестеріне табыс тіледі.
«ҚТ» ақпарат
