Әлемнің асылы

Өмірдің өзегі саналатын әйел жаны – табиғатынан нәзік, бірақ сол нәзіктіктің астарында шексіз төзім мен биік рух жатыр. Әйел адамға тән сезімталдық, мейірім, сүйіспеншілік – әлемді жылытып тұрған ұлы күштің бастауы десек, қателеспейміз. Әйел болмаса, өмірдің мәні де, сәні де кем болары анық. Олар тіршіліктің сәні мен мәнін арттырып, әлемге мейірім мен шуақ сыйлайды.

Қазақ ұлты әйел затына ежелден ерекше құрметпен қараған. «Қыз өссе – елдің көркі», «Ана – өмірдің шамшырағы», «Әйел – үйдің ырысы» деген аталы сөздер – осының дәлелі. Ананың алақаны – бесіктің ғана емес, ұрпақтың болашағын тербететін құдіретті күш. «Ана бір қолымен бесікті тербетсе, бір қолымен әлемді тербетеді» деген қанатты сөздер – арулардың, аналардың рөліне берілген әділ баға.

Сондай-ақ қазақ тарихында ел бастаған, сөз бастаған, ұрпақ тәрбиелеген дана аналар мен батыр қыздар аз болмаған. Домалақ ана, Қарашаш ана, Ұмай ана сынды аналар ұрпаққа парасат пен мейірімнің символы ретінде мұра болып қалды. Ал Тұмар ханым, Гауһар ана, Бопай ханым сынды батыр аналарымыз елін, жерін қорғап, қайсарлықтың үлгісін көрсетті. Бұлардың барлығы – әйел болмысының қос қыры: бір жағы нәзіктік пен мейірім, екінші жағы қайсарлық пен ерлік екенін айғақтайды.

Бүгінгі күнде де әйелдер қоғамның барлық саласында белсенді қызмет етіп, ел дамуына зор үлес қосуда. Ұстаз, дәрігер, ғалым, өнер иесі, кәсіпкер, саясаткер бола жүріп, отбасындағы орнын да ұмытпай, баласына мейірімін төгіп, жарына тірек бола білетін жандар – нағыз рухани кемелдіктің үлгісі.

Әйел жаны – өз алдына бөлек бір әлем. Оның жүрегінде баласына деген махаббат та, жарына деген сүйіспеншілік те, елге деген адалдық та, табиғатқа деген құрмет те тоғысқан. Әйелдің бір ауыз жылы сөзі, бір ғана мейірімді көзқарасы қаншама жанның жүрегіне үміт сыйлап, өміріне шуақ шашатыны сөзсіз. Әйел – көктемнің көркі секілді. Көктемнің алғашқы бүр жарған гүлі жер бетін қалай әсемдікке бөлесе, әйел де өмірдің гүлденуіне себепші. Табиғаттың оянуы мен әйел болмысы арасында үндестік бар. Себебі екеуі де өмірге жаңалық әкеледі, жылулық пен жарық сыйлайды.

Осы орайда, көктемнің ең әдемі мерекесі қарсаңында барша нәзік жандыларға тек ізгі тілектер арнаймыз. Дендеріңізге саулық, жүректеріңізге тыныштық, жанарыңызға қуаныш, ғұмырыңызға шуақ тілейміз. Арман-мақсаттарыңыз орындалып, өмір жолыңыз әрдайым гүлдей жайнап, бақыт пен шаттыққа толы болсын!

Әйел мейірімі бар жерде – тыныштық, ананың батасы бар жерде – береке, қыздың күлімдеген жанары бар жерде – үміт пен қуаныш бар. Осындай әлемнің барлығы сіздермен көрікті.