МАРАПАТ ТӨРІНДЕ – ЖЫЛ ҮЗДІКТЕРІ
Жылан жылының төрімізге озып, ұлу жылының күнтізбесінің аяқталар шағына да келіп қалдық. Халқымыз «Ескі жыл есірке, жаңа жыл жарылқа» деп, өткен жылды саралап, келер жылға үлкен үміт артып, игі тілек тілейді.
Жаңа жыл қарсаңында сан салада жұмысты қорытындылап, үздіктерді анықтау игі дәстүрге айналған. Биыл ауданда еңбегімен ерекшеленіп, дарынымен дараланғандар сый-құрметке бөленді. Аудан әкімі Жандос Еркінбектің қатысуымен жыл қорытындысына арналған салтанатты іс-шара өтіп, жыл үздіктері марапат төрінен көрінді.
Жиында сөз сөйлеген аудан басшысы бірінші кезекте жиналған жұртшылықты Жаңа жыл мерекесімен құттықтап, биылғы жыл жетістікке толы болғанын тілге тиек етті.
– Биыл аудан халқының әл-ауқатын арттыру және аудан экономикасын нығайту мақсатында ауқымды жұмыстар атқарылды. Макроэкономикалық көрсеткіштер бойынша ауданымыз облыс өңірлері арасында алдыңғы қатардан көрінді. Аудан бюджеті 18 млрд 593 млн теңгені құрап, 2023 жылғы бекітілген бюджетпен салыстырғанда 6 млрд 601 млн теңгеге немесе 55,0 пайызға артып отыр. Бұл – Мемлекет басшысының, Үкіметтің және облыс әкімінің ерек- ше қолдауымен жүзеге асырылған жұмыстардың нәтижесі, – деді аудан әкімі.
Мұнан өзге аудан басшысы жаңадан бой көтерген заманауи ғимараттар, ашылған әлеуметтік нысандар, пайдалануға берілген тұрғын үйлер, жүзеге асырылған ауқымды жобалар мен алға қойған нақты міндеттерді атап өтті.
Мерекелік іс-шара барысында ауданның әлеуметтік-экономикалық дамуына елеулі үлес қосқан сала мамандары облыс және аудан әкімінің алғыс хаттарымен марапатталды. Сонымен қатар, жыл бойы ерекше жетістіктерімен танылған жыл үздіктері арнайы марапатқа ие болды.
Сан саланың үздіктері болғандардың қатарында Ақтөбе ауылдық округінің әкімі Қанат Аралбаев «Жылдың үздік әкімі», аудандық экономика және қаржы бөлімі экономика және бюджетті жоспарлау тетігінің меңгерушісі Қанат Ілиясов «Жылдың үздік қаржыгері», Ақжар шаруа қожалығының төрағасы Нұрлан Қомшабаев «Жылдың үздік ауылшаруашылығы саласының қызметкері», Өмірбек Ыдырысов «Жылдың үздік құрылысшысы», No108 мектептің мұғалімі Тұрсын Бүркітбаева «Жылдың үздік ұстазы», аудандық аурухананың хирургия бөлімінің меңгерушісі Шакрат Бердібаев «Жылдың үздік медицина саласының қызметкері», аудандық Жыраулар үйінің директоры Айгерім Ешбаева «Жылдың үздік мәдениет саласының қызметкері», жасөспірімдер арасындағы ауыр атлетикадан ІІ дүркін әлем чемпионы, жастар арасындағы Әлем чемпионатының қола жүлдегері Ерасыл Сәулебек «Жылдың үздік спортшысы», Меңдігүл Әлқуатова «Жылдың үздік әлеуметтік сала қызметкері», аудандық электр торабының басшысы Нұржан Дариябаев «Жылдың үздік коммуналдық қызметкері», аудандық No10 өрт сөндіру бөлімінің өрт-сөндіруші құтқарушысы Қасиет Қасымов «Жылдың үздік өрт сөндірушісі», аудандық полиция бөлімінің тергеу бөлімшесінің тергеушісі Жандос Бағланбаев «Жылдың үздік сақшысы» атанды.
Жылды қорытындылау іс-шарасы аудан өнерпаздарының мерекелік бағдарламасымен жалғасты.
Ақнұр САҒЫНТАЙ
