Жыл үздіктері анықталды
Аудандық мәдениет үйінде аудан әкімі жылды қорытындылап, үздіктерді марапаттады. Салтанатты іс-шарада аудан басшысы Қайрат Нұртай қармақшылықтарды Жаңа 2022 жыл мерекесімен құттықтап, атқарылған жұмыстар мен жеткен жетістіктерге тоқталды.
- 2021 жыл аудан халқы үшін жемісті жыл болды. Биылғы жылы ауылшаруашылығы саласы бойынша Қармақшы ауданы облыстағы «Үздік аудан» атанды. Жосалы кентінде табиғи газ іске қосылып, 1500-ге жуық отбасы көгілдір отынның игілігін көруде. Жосалы кентінен көп балалы отбасыларға арналған 10 тұрғын үй табысталды. Сондай-ақ, қыс-жаз мезгілдерінде балалар тынығуға арналған лагер құрылысы аяқталып, пайдалануға беруге дайындалып жатыр.
Жаңа жыл баршаңызға жақсы жетістіктер мен толағай табыстар әкеліп, әрбір шаңыраққа бейбіт өмір, мол жақсылық сыйласын, - деді аудан әкімі Қайрат Нұртай.
Жиында ауданның әлеуметтік-экономикалық дамуына өзіндік үлесін қосып, әр салада табысты еңбек етіп жүрген азаматтар «ҚР Тәуелсіздігіне 30 жыл», «Халық алғысы» медальдарымен марапатталып және «Жыл үздіктері» номинацияларын иеленді.
Салтанатты іс-шара мерекелік концертпен жалғасып, жергілікті өнерпаздар кеш қонақтарына мерекелік көңіл-күй сыйлады.
