Студент жастарымыздың жан-жақты, саналы, терең білімді, бәсекеге қабілетті болуы – қоғам сұранысы. Байқоңыр қаласындағы ҚР білім беру стандартымен білім беретін академик С.Жиенқұлов атындағы Байқоңыр жоғары колледжіне түскен студенттер болашақ автомеханик, турист агенті, техник-құрылысшы, арнайы тігінші, техник-электронщик мамандары болып шығады. Білімгерлеріміздің заман талабына сай, нағыз сұранысқа ие білікті маман болатындарына сенім мол.

Жақында Ақай ауылдық мәдениет үйінде білім беру мекемесінің 1-курс студенттерін студенттер қатарына қабылдау салтанатты кеші «Студенттік өмір – жарқын болашақ» деген атпен өтті.

Салтанатты кеште колледж директоры, Қармақшы ауданының құрметті азаматы Әнуар Дәуленбаев пен Ақай ауылдық округінің әкімі Эльмира Қазиева студент қатарына қабылданған білімгерлерді құттықтап, игі тілектерін білдірді.

Кеш барысында Шолпан Өмірзақ жетекшілік ететін «Сандық техника» мамандығы бойынша – техник-электронщик біліктілігінің 1-курс ТЭ-124 оқу тобының сынақ кітапшасын колледж директоры Әнуар Дәуленбаев салтанатты түрде табыстады. Айгүл Абауова жетекшілік ететін «Автомобиль көлігіне техникалық қызмет көрсету, жөндеу және пайдалану» мамандығы бойынша – Автомобиль көлігін жөндеу шебері біліктілігінің 1-курс АШ-124 оқу тобына сынақ кітапшасын ауыл әкімі Эльмира Қазиева тапсырды. Гүлзира Айтқұлова жетекшілік ететін Техник-механик біліктілігінің 1-курс ТМ-124 оқу тобының білімгерлеріне сынақ кітапшасын «AMANAT» партиясы Байқоңыр филиалының төрағасы Еркін Рзалиев табыс етті. Баян Қожанова жетекшілік ететін «Тігін өндірісі және киімдерді үлгілеу» мамандығы бойынша – Арнайы-тігінші біліктілігінің 1-курс АТ-124 оқу тобының сынақ кітапшасын «Асарплюс» ЖШС директоры Сейл Жұмадияров, ал «Ғимараттар мен құрылымдарды салу және пайдалану» мамандығы бойынша – Құрылыс әрлеу жұмыстарының шебері біліктілігінің 1-курс ТС124 оқу тобының (топ жетекшісі Гүлжазира Байтерекова) сынақ кітапшасын «Жастар ресурстық орталығы» Байқоңыр қалалық бөлімінің басшысы Азамат Ердәулетов ұсынды. «Туризм» мамандығы бойынша – «Турист агенті» біліктілігінің 1-курс ТА-124 оқу тобының (топ жетекшісі – Айкүміс Қосуақова) студенттеріне сынақ кітапшасын Байқоңыр қалалық этносаралық қатынастар жөніндегі сарапшысы Ақерке Әбдіқаниева берді.

Іс-шара аясында өнерлі студенттер ән мен жырдан шашу шашып, кеш қатысушыларының көңілдерін көтерді. Сонымен қатар салтанатты кеште колледжіміздің мәртебесін жоғары көтеріп, қоғамдық жұмысқа белсене араласып жүрген үздік білімгер, АШ-123 оқу тобының 2-курс студенті Ернар Бағдәулетов «Білім кілтін» ТЭ-124 оқу тобының студенті Бибарыс Жұмабаевқа салтанатты түрде табыстады. Сонан соң барлық студент орындарынан тұрып, ант қабылдады.

Студенттік өмір – бұл жаңа таныстардың уақыты, адам өміріндегі ең қызықты сәттер, жүрекке терең із қалдыратын, кейін жарқын естеліктер болып есте қалатын кезең. Студенттік шақта адам өмірді таниды, көптеген қызықты байланыстар мен таныстар табады, мамандықты игереді және жұмыс пен қарым-қатынас үшін қажетті дағдыларды үйренеді. Сол себепті студент атанған білімгерлерімізге тек қана сәттілік тілейміз!