«Үлкеннен үлгі алған кіші адаспас» дегендей, қариялар жүріп өткен ұлы соқпақ кейінгіге үлкен өмір мектебі болары анық. Осы ретте Төретам кенттік клуб үйі «Қарттардың да өнерге бар таласы» атты ардагерлер арасында өнер фестивалін ұйымдастырды. Тәлімді іс-шараға өнерлі ата-әжелер қатысты. Өз өнерін ортаға салған 11 қария жиналған жұртшылықтың көңілін көтерді. Қатысушылар арасында құрметті ұстаз да, суретші де, қоғам қайраткері де бар. Белсенді қарттар әсем ән орындап, күмбірлетіп күй тартты. Клуб үйінің өнерпаздары да тамаша іс-шараға үлес қосып, өнерлерін ортаға салды.

Іс-шара соңында Төретам кентінің әкімі Ғалымжан Тәжмағанбетұлы қатысушы ардагерлерге дипломдар мен бағалы сыйлықтар табыстады. Үлкендердің батасын алып, алғысына бөленген кеш көңілді аяқталды. Бұл шара алдағы уақытта жалғасын тапсын деген ұсыныстар айтылып, көрермендер тарапынан зор қошеметке ие болды.