ОЙЛЫЛАР ОЙЫНЫ
Бейсенбі күні аудандық спорт және туризм бөлімі мен «Қазақ Соқырлар қоғамы» облыстық филиалының ұйытқы болуымен аудандық денешынықтыру және сауықтыру кешенінде белгілі азамат, ерекше жандардың жанашырқолдаушысы болған Асқар Қолдабековтің атында мүмкіндігі шектеулі көз мүгедектері арасында шахматтан облыстық турнир ұйымдастырылды.
Бұл турнир – ерекше қажеттіліктері бар азаматтарға өз қабілеттерін шыңдауға, шахмат арқылы интеллектуалдық және стратегиялық ойлау дағдыларын дамытуға мүмкіндік беретін маңызды шара. Шахмат – тек шаршы тақтадағы ойын ғана емес, ол адамның ойлау қабілетін, ерік-жігерін және өмірлік қиындықтарын жеңуге, шыдамдылығын арттыруға тәрбиелейтін құрал.
Спорттық шараны аудандық дене тәрбиесі, спорт және туризм бөлімінің басшысы Нұрбол Мырзабаев ашып, қатысушыларға сәттілік тіледі, сонымен қатар олардың өмірдегі табандылығы мен ерік-жігерлерін атап өтті.
Аталған іс-шараға «Тұран-Шах Қызылорда мүгедектер» қоғамдық бірлестігі демеушілік жасады.
Турнирдің жабылу салтанатында Асқар Сайлауұлының анасы, еңбек ардагері Фазила Ниязова барша қатысушыға аналық алғысын білдіріп, лебізін жеткізді.
Жеңімпаздар мен жүлдегерлер демеуші тарапынан ұйымдастырылған бағалы сыйлықтарға ие болды.
Салтанат ӘБЕНОВА
