Бүгін Қармақшы ауданының Ақжар ауылдық клуб үйінде аудандық штаб мүшелері «Ораз-ахун ЛТД» ЖШС, «Ақжар» шаруа қожалығы және «Шакизада» шаруа қожалығының еңбек ұжымдарымен кездесу өткізді. Кездесуге аудандық мәслихат депутаты Б. Бөгетов, Ақжар ауылдық ардагерлер кеңесі төрағасының орынбасары І. Нарымбетов қатысты.
Кездесу барысында штаб мүшелері еліміздегі энергетика саласының қазіргі жағдайы туралы баяндап, көршілес мемлекеттерге энергетикалық тәуелділіктен арылу қажеттілігіне тоқталды. Сондай-ақ, олар экологияны жақсарту және жасыл экономикаға көшу жолында атом электр станциясын (АЭС) салудың маңыздылығы туралы айтты. АЭС құрылысы елдің тұрақты энергия көздеріне көшуге және экологиялық тұрақтылықты қамтамасыз етуге мүмкіндік беретін шешім ретінде қарастырылып отыр.

Штаб өкілдері АЭС салудың ел экономикасына тигізетін оң әсерлерін атап өтіп, бұл жобаның заманауи талаптарға сай және экологиялық тұрғыдан тиімді екенін түсіндірді. АЭС тек энергетикалық тәуелсіздікке қол жеткізуге көмектесіп қана қоймай, сондай-ақ қоршаған ортаны қорғау мен болашақ ұрпаққа таза экология қалдырудың бірден-бір жолы екені айтылды.

Кездесуге қатысқан еңбек ұжымдарының өкілдері мен ауыл тұрғындары ел үшін маңызды бұл бастаманы қолдайтындарын білдіріп, атом энергетикасын дамытудың қажеттілігін жеткізді.