Тиімді әдіс – денсаулыққа сеп

qarmaqshy-tany.kz Жақында ауданның психологиялық-педагогикалық түзету кабинетінің басшысы Л.Мұсаеваның жетекшілігімен және кабинет мамандарының ұйымдастыруымен «Ерекше білім беруді қажет ететін балалармен жүргізілетін түзете-дамыту жұмыстарының бағыттары» тақырыбында Ашық есік күні өтті. Оған «AMANAT» партиясы аудандық филиалының атқарушы хатшысы Д.Буханов, аудандық емхананың бас дәрігері Б.Нысанбаев, «Қармақшы таңы» газеті редакциясының бас редакторы С.Райымбаева, аудандық агроколледж директоры Б.Сайдуллаұлы және түзете-дамыту сабақтарын алушы балалардың ата-аналары қатысты.

Іс-шарада жұмыс кабинеттерімен мекеме басшысы Л.Сұлтанбекқызы таныстырып, мамандардың атқаратын жұмыс тарына тоқталды. Атап айтқанда, педагог-дефектологтар Р.Абдраман, Г.Нұрпейісова, педагог-психолог Р.Бұйрабаева, әлеуметтік педагог Г.Досмырзақызы, педагог-логопед Г.Амантаева, емдік денешынықтыру нұсқаушысы Н.Әлібекқызы балалармен жүргізілетін жұмыс әдістемелерін тренинг, ойын түрлері арқылы көрсетті.

Кабинет бала денсаулығын жақсарта түсуде басқа да тәрбие, білім ошақтарымен бірлесе қызмет етуде. Мысалы, осы күнгі «Ертегілер әлеміне саяхат» атты тақырыпта балаларға қызықты қойылым қойған аудандық балалар кітапхана ұжымын айтуға болады. Аудандық Оқушылар үйінің «Руханият» үйірмесінің жетекшісі К.Құлбарақова да әркез көмекке келуге даяр.

Ашық есік күнінде сабақ алушы балалар мен кабинет мамандары «Көңілді старт» спорттық шарасын өткізіп, жарыс ұйымдастырды.

Қорытындысында келген қонақтар ой-пікірлерін айтып, ұжым жұмысына сәттілік тіледі.