– Өзімнің әжем тігіннің тілін білетін шебер кісі еді. Бала кезімізден құрақтарға қарап бой жетіп, ой түйгенбіз. Сол кездегі көрген құрақтар бүгінде жеке кәсіпкер атануыма көмегін тигізуде. Әкемнің қарындасы, яғни менің әпкем де жасау тігудің шебері. Екі мамандық бойынша жоғары білім алсам да, жүрегім қолөнерді қалады. Бүгінде кәсіппен айналысуыма отбасымның қолдауы шексіз. Енем үй тіршілігі мен бала тәрбиесінде көмек қолын созса, отағасым өзінің жұмысынан бос уақытында маған тігіске дейінгі жұмыстың барлығын дайындап береді. Ал қыздарым көрпе-көрпешеге мақта салғанда жәрдем береді. Олар болмаса мен сүйікті ісімді бұлай дөңгелете алмас едім. Құрақтан бөлек перде тігу, құдалық, тұсаукесер, сүндет тойларға арналған жасаулар жасаймын. Мемлекет тарапынан берілетін грант конкурсына қатысу үшін курсқа жазылып, кәсіпкерлік бойынша білім алдым. Мемлекеттік конкурсқа қатысып, қайтарымсыз грант иегері атандым. Бұл да менің аяқтан тұруыма демеу болды, – дейді кәсіпкер Асел Қабаққызы.

– «Аламан құрақ» жобасының ауқымы өте үлкен. Жоба туралы естігенде, отбасыммен ақылдасып, қатысуға бел будым. Бізге алдын ала арнайы пдф формат ұсынылды. Онда құрақ көрпешенің өлшемі, оюлардың орналасуы, қолданылатын мата түрлері көрсетілген. Ауқымды жоба болғандықтан оған жоғары сападағы қымбат маталар таңдалған. Көрпешеге қажетті заттарды сатып алып, берілген нұсқау бойынша 2 күнде тігіп шықтым. Аудан әкімдігі осы жобаға қатысып, барып келуіме қаржылай қолдау білдірді. 200-ден аса құрақшы 2,5 метрден бірдей типтегі көрпеше жасап алып бардық. Көк тумен түстес көрпешелер орталық алаңға төселді. КИнЭС кітабінің ресми өкілі Қуандық Құдайбергеновтің өзі барлық көрпешені өлшеп, рекордтар кітабына енгізді. Бізге үлес қосқанымыз үшін алғыс хат табыстап, сертификат берді. Алдағы уақытта кітап та жарыққа шығатын болады. Сол уақытта біз дайындап апарған көрпешенің құны 70000 теңгемен бағаланды. Одан бөлек түрлі қолөнер шеберлерінің көрмесі ұйымдастырылды. Астана халқының ұлттық құндылыққа деген құрметі ерекше екен. Өнімдерін апарған құрақшылар жәрмеңкеден олжалы оралды. Елге танымал тігіншілермен танысып, әлемді таңқалдырып жүрген Ырза ханымнан бата алдым. Жаңа таныс, жаңа ортадан тың дүниелер үйреніп, біліктілігімді арттырдым. Қазіргі таңда бір құрақтың бетіне қарап отыра беруге болмайды. Адам өзін-өзі үздіксіз дамытып отыруы тиіс. Жаңа дизайн, жаңа нәрсені үйрену тек жақсы нәтижеге жетелейді. Енді тігіншілер қауымы болып келесі жылы осындай құрақпен әлемдік рекордқа шығуды жоспарлап отырмыз.Оған дайындықты бастап кеттік, – дейді шебер.