Игі іс-шараға аудан әкімі Жандос Еркінбекұлы, аудандық мәслихат төрағасы Әділ Қошалақов, аудандық ардагерлер кеңесінің төрағасы Асқар Мереков қатысты. Ақтөбеліктерді жаңа нысанның ашылуымен құттықтаған аудан әкімі ауыл футболшыларына спорт доптарын сыйға тартты.

– Ауданымызда бұқаралық спортты дамытуға ерекше мән беріліп, спорт алаңдары көбейіп келеді. Мұның бәрі жастардың спортпен айналысып, денсаулығының мықты болуына жасалған үлкен мүмкіндік. Дені сау ұрпақ – қашанда ұлттың ең қымбат байлығы. Сондықтан ауыл тұрғындарына да барынша қол жетімді болу үшін қажетті жағдайлар жасалуда. Алдағы уақытта елімізде спорт саласындағы жетістіктер мен табыстар арта берсін, – деді аудан басшысы Жандос Еркінбек.   

Айта кетейік, ауыл орталығындағы спорт алаңы «Оңталап» шаруа қожалығының басшысы Әбдіхамит Аралбаевтың демеушілігімен салынған. Мұнда барлығы заманауи үлгіде. Тұрғындардың қалауына қарай шағын футбол, баскетбол және волейбол алаңдары бар. Сонымен қатар спорт алаңы балалардың қауіпсіздігі үшін түнгі жарық шамдармен қамтылған.

Ел игілігіне жасалған сыйға тұрғындар риза. Ауылдың өркендеуіне атсалысқан азаматтарға олардың айтар алғысы шексіз.

– Біз ауылда тұрсақ та қаладағыдай мұнда да жайлы жағдайды қалаймыз. Таза жол, жарық көше ауыл тұрғындарының арманы. Шүкір бәрі өз кезеңімен орындалып, ауылымыз көркейіп келеді. Көптен күткен спорт алаңы да есігін айқара ашып, ауыл жастарын қуантуда. Елдің қамын ойлап, ауылға өз үлесін қосып отырған Хамит бауырымызға рақмет айтамыз. Осындай игі істері жалғасын таба берсін, – дейді ауылдың үлкендері.