Ата заңымыз ардақталған күн!
qarmaqshy-tany.kz Шәмшат Төлепова атындағы аудандық мәдениет үйінде Ата Заңымыз – Конституция күніне арналған мерекелік іс-шара өтті.
Салтанатты шараға аудан әкімі Жандос Еркінбекұлы қатысып, барша қауымды мемлекеттік мерекемен құттықтады.
"Ата заңды ардақтау – болашаққа батыл қадам басқан егемен еліміздегі әрбір азаматтың парызы. Конституция – халықтың өмір сүру ережесі, мемлекеттіліктің іргесін бекітіп, халықаралық кеңістікте ұдайы өркендеуінің негізі болып табылады. 1995 жылы бүкілхалықтық референдумда қабылданған Конституция - халықтың бірлігін, қоғамдық және рухани келісімін нығайтып, егемендік пен саяси тұрақтылықтың кепілі болғаны белгілі.
Өткен 2022 жыл еліміз үшін түбегейлі өзгеріс әкелгенін өздеріңіз жақсы білесіздер. Мемлекет басшысы Қасым-Жомарт Кемелұлы Тоқаев ел дамуы үшін мәні зор саяси реформалар жариялады. Бұл өз кезегінде елдің басты заңы – Конституцияға бірқатар өзгерістер әкелуді талап етті. Осылайша, 2022 жылдың 5 маусымында республикалық референдум өткізіліп, Қазақстан Ата Заңының 33 бабына 56 өзгерту енгізілді.
Бұл өзгерістер жаңару жолындағы Жаңа Қазақстанның заманауи талаптарына сай қалыптасты. Ал «Жаңа Қазақстан» – барлық адамға тең мүмкіндік беру, экономика мен саясаттағы жасандылықты жою, елдің саяси өміріне белсене араласатын қоғамы бар өркениетті мемлекет құру болып табылады",- деді өз құттықтауында аудан басшысы.
Мерекелік шара аясында ауданымыздың әлеуетінің артып, экономикасының қарыштап дамуына қарымды еңбегі сіңген бірқатар азаматқа марапат табысталды.
Мәртебесі биік мереке жыраулық өнерді серік еткен жыршы-термешілер мен аудан өнерпаздарының әншашуларымен жалғасын тапты.
Қармақшы ауданы әкімінің баспасөз қызметі
