Сәрсенбіде Жосалы кенті орталығындағы "Данара" дәмханасында сол төңіректегі Тайшық би, Қойшыбаев, Балқы Базар, Наурыз көшесі тұрғындарының ұйымдастыруымен тасаттық берілді. Оған аудан басшысы, ардагерлер, көше тұрғындары қатысты. Онда алдымен өмірден өткен ата-бабалар рухына арналып Құран оқылды. Одан соң аудан әкімі Жандос Еркінбекұлы сөз сөйлеп, тасаттық берудің түпкі мақсатына, қазақ халқының ертеден келе жатқан дәстүрі екеніне тоқталды.

Басқосуда аудандық ардагерлер кеңесінің төрағасы Асқар Мереков, ауданның Құрметті азаматтары Әбдірахман Құлдүйсенов, Қаршыға Есдәулетов, еңбек ардагері Отар Жақыпов, тағы басқалары ел арасындағы ауызбірлік пен ынтымақ жайында ойларын ортаға салды.

Іс-шарада Марал Кенжеқараева әрбір істе ұйымшылдық таныта білетін көше тұрғындарына ризашылығын жеткізсе, "Данара" дәмханасының иесі Гүлдана Әшірбековаға арнайы алғысын айтып, иығына орамал салды.

Тасаттық соңында ауданның сыйлы ақсақалы Орынбасар Сариев аталық жолымен ақ батасын берді.

– Айналамызда неше түрлі апаттар, жағдаяттар орын алуда. Одан бөлек, судың тапшылығы, күннің шамадан тыс ысуы секілді дүниелер болуда. Осындай қиыншылықтар мен апаттардың алдын алуда Алладан тілек тілеп, дұға ету ата-бабамыздан келе жатқан дәстүр. Сол ізбен біз де көршілер болып өз дұға-тілегімізді білдірейік, Құран оқытайық деп тасаттық беруді шештік. Оған атсалысқан барша жанға нұр жаусын деп тілеймін. Ауданымызда татулық пен бірліктің туы биікте желбірей берсін, – дейді көше комитетінің төрайымы Бақыткүл Төребаева.