Сандарды сөйлетсек, жыл сайын республика көлемінде 500-дей адам суға батып ажал құш са, солардың басым бөлігі – жұқа мұз құрбандары екен. Оның арасында балалардың да үлес салмағы басым. Мәселен, осы кезеңдегі қалыңдап үлгермеген мұз – нағыз қауіп-қатер зонасы. Алда-жалда бейқамсыздықтан мұз үстіне шығып, қауіпсіздік ережесін сақтамау кез келген адамның басына қайғы төндіреді, төтенше жағдайлардың орын алуына себепші болады. Осындай қауіптің алдын алу үшін Иіркөл ауылындағы No106 орта мектептің АӘТД пәнінің мұғалімі Жалғасбек Ахметов «Абайлаңыз, жұқа мұз» тақырыбында түсіндірме жұмыстарын жүргізді. Басты мақсат – оқушылардың өмір қауіпсіздігін сақтау. Оқу- шыларға қайғылы жағдайға ұшырамас үшін қыс мезгілінде өзен, көл, каналдарға барып өздігінен сырғанақ теппеу қажеттігі айтылып, қауіпті жағдайлардан қорғану туралы ақпараттар берілді.

Енді ғана қатқан су айдынында болу өте қауіпті екендігін ешқашан ұмытпау керек. Алғашқы мұзға шығуға асықпаған жөн. Өйткені олардың ернеулері берік, орнықты болып көрінгенімен, не- гізінде ересек адамды ғана емес, кішкентай бүлдіршінді де көтере алмайды. Су айдынында мұздың қалыңдығы барлық жерінде бірдей болмайды. «Сақтансаң, сақтаймын» дегендей, қауіптің алдын алып, қауіпсіздік ережесін қаперге алып жүрейік.