Айтулы тәрбие мен білім ошағы үшін 15 қыркүйек – жаңа оқу жылының бастау алар айрықша күні есептеледі. Осы күні жылдағы дәстүрмен биыл да "Армысың, өрелі өнер ордасы!" тақырыбында мерекелік жиын өтті. Оған "Аңсаған" мүмкіндігі шектеулі балалар қоғамдық бірлестігінің төрайымы Бақыткүл Райымбаева, Жастар ресурстық орталығының директоры, ақын Сырым Әділбеков қадірлі қонақ ретінде қатысып, балаларға жылы лебіздерін жеткізді. "Адамның бір қызығы бала деген" демекші, перзентінің болашағынан үлкен үміт күтетін әрбір ата-ананың көңіліне қуаныш ұялатқан іс-шарада әсем әндер шырқалып, биден шашу шашылды. Сонымен қатар мерекелік жиын барысында балалар қоңырау қағып, "Балалар жылында" жаңа оқу жылының жаңа қарқынмен бастау алып жатқанының куәсі болды.

Перизат САДАҚБАЙҚЫЗЫ,