Ұлы ұлттың дүбірі — домбыра ұлықтаған күн
Әрбір ырғағы тарихтың бізге жеткен көне сарынын, бүкіл бір ұлттың шежіресін, ұлыстың баға жетпес мол мұрасын, мыңдаған замана аманатын арқалаған құдірет – Домбыра. Тарихтың қилы кезеңдерінен, сан-соқпаққа толы шақтардан аман жеткен домбыра – ұлттық болмысымыздың бітімгері!
Сыр бойы – тұтас ұлттың тарихының куәсі болған киелі мекен. Сырдың күйшілерінің қазіргі нар тұлғасы Қазақстан Композиторлар Одағының мүшесі Мұрат Сыдықов бастаған күйші-жыршылар мен бірге өңірдегі өнер ұжымдары да ұлтымыздың ұлы аспабын ұлықтап, дәстүрлі өнерімізді дәріптеп, қазақы өнердің тамырына қан жүгіртіп, күмбірлеген күй құдіретін жалпақ жұртқа паш етіп жүр.
Қазақтың жаны, болмысы, ұлттық ырғағына айналған домбыра барда, ұлттық өнердің жанашырлары барда ұлтымыз мәңгілік. Өскелең ұрпақтың қасиетті домбыраға, ұлттық өнерге деген құлшынысын арттыра түскен Ұлттық Домбыра дүбірі рухымызды жанып, елдігімізді еңселі ете берсін!
