Бірлік – ұлы күш
Сан ұлтқа сая, татулықтың тұрағы болған қасиетті Қармақшы жерінде ырысты ынтымақ күні айрықша мерекеленді. Орталық алаңға жиналған жұртшылық бірлік тойында бір-біріне ақжарма тілектерін білдірді. Ал аудан өнерпаздары әдемі ән-жырдан шашу шашты.Қармақшылықтарды достықты дәріптеген мерекемен аудан әкімі Әділбек Ерсұлтанов құттықтап, жүрекжарды лебізін білдірді.
Салтанатта түрлі ұлт өкілдерінің ұлттық биі насихатталып, рухты, мағыналы әндер мамыражай мейрамның мерейін тасытты.
Сондай-ақ айтулы күнде аудан жастарының қатысуымен арқан тартыс, асық ату, гір тасын көтеру сынды спорт түрлерінен сайыстар өткізіліп, ұлттық қолөнер бұйымдарынан арнайы көрме ұйымдастырылды.
Думанды іс-шараны еңкейген қартынан еңбектеген баласына дейін тамашалаған жерлестеріміз бен мереке қонақтары бірлік күнін көтеріңкі көңіл-күймен қарсы алды.
Сонымен қатар мерейлі мереке қарсаңында аудан тұрғындары үшін төмен бағада жәрмеңке өткізіліп, балалар жылына орай белсенді жастар мен «Демеу» еріктілер тобының ұйымдастыруымен көпбалалы отбасылардың балаларын тегін ойын-сауық орталығына апарып, жас бүлдіршіндерді қуанышқа бөледі.
«Қт» ақпарат
