Қазақстанда коронавируспен ауыру көрсеткіші айтарлықтай төмендеді
Соңғы екі аптада республикада коронавирус жұқтыру деңгейі 11 процентке төмендеді. Бұл туралы денсаулық сақтау бірінші вице-министрі Марат Шоранов мәлімдеді, деп хабарлайды Stan.kz ақпарат агенттігі.
Денсаулық сақтау министрі Алексей Цойдың демалысқа шығып кетуіне байланысты үкімет отырысында вице-министрі Марат Шоранов елдегі эпидемиологиялық жағдайды баяндады. Оның мәліметінше, Қазақстанда соңғы екі айда сырқаттану 2,8 есе (аптасына 33 346 адамнан 11 709 адамға дейін), ал өлім-жітім 4,1 есе (аптасына 761 науқастан 184 науқасқа дейін) азайды.
"Қазақстанда соңғы екі аптада ауру 11 пайызға төмендеді. Бұл жалпы эпидемиологиялық жағдайдың тұрақталуын көрсетеді", - деді Шоранов үкімет отырысында.
1 тамыздан бастап республика бойынша инфекциялық төсек-орындар 33%-ке дейін, ал реанимациялық төсектер 27%-ке дейін босады. Резервте 30 мыңнан астам төсек-орын бар.
Сондай-ақ вице-министрдің сөзінше, соңғы үш айда науқастар саны 2 есе (90 767 науқастан 43 397 науқасқа дейін) азайған.
Сонымен қатар оның мәліметі бойынша, COVID-19 инфекциясына қарсы вакцинамен жалпы халықтың 40,2 пайызы қамтылған.
"Екпенің 1-компонентімен 8 миллион 300 мыңнан астам адам егілді, егілуге тиісті халықтың 73,4% немесе жалпы халықтың 44,3% қамтылды, 2-компонентпен 7 миллион 600 мыңға жуық адам вакциналанды. Бұл - егілуге тиісті халықтың 66,6% немесе жалпы халықтың 40,2%", - деді Марат Шоранов.
Бұнымен қоса Шорановт Pfizer вакцинасын жеткізу 8-14 қараша аралығында жүзеге асырылатынын айтты.
"Pfizer вакциналары ағымдағы жылдың 8-14 қараша аралығында жеткізіледі деп күтілуде. Бұрын айтылған шарттық міндеттемелерге сәйкес, бұл екпе екі миллион адамға салынады", - деді Шоранов үкімет аясында.
Естеріңізге сала кетейік, Қазақстанда Pfizer вакцинасын 12 жастан асқан балаларға және жүкті әйелдерге егу жоспарлануда.
