Таяуда Жанқожа батыр атындағы №269 орта мектепте «Болашаққа кітаппен» тақырында аймақтық семинар өтті. Семинардың басты мақсаты – оқырмандарға кітаптар қорындағы ақын жазушылар мен ғұламалардың шығармаларының туындыларының маңыздылығын ұғындыру, семинар барысындағы жұмыстар арқылы кітаптардың рухани қазына екенін жеткізу.
Шара барысында аудандық білім бөлімінің әдіскері Ләззат Есханова, №50 мектеп-лицейінің кітапхана меңгерушісі Мария Әділова, № 30 мектептің кітапхана меңгерушісі Мира Берманова, Байқоңыр қаласындағы мектеп кітапхана меңгерушілері қонақ ретінде қатысса, №80 мектеп-гимназия, №279, №99, №85 орта мектептердің кітапхана меңгерушілері өз жұмыстарын көрсетті. 
Семинарда мектеп директоры  Фарида Аманова шараның мән-маңызына тоқталып өтті. 
– Кітап – рухани қазына. Сондықтан ол қай уақытта болмасын өз құндылығын жойған емес, жоймайды да. Бүгінгі шара оқырман мен кітапхана арасындағы алтын көпір байланысты нығайту. Оқырмандар ортаға өз өнерлерін салып жатыр. «100 кітап» бағыты аясында да ауқымды шаралар ұйымдастырылмақ, – деді Ф.Аманова.
Мектеп оқушысы Ұлжан Сапарғалиева Ж.Молдағалиевтің «Мен қазақпын» өлеңін оқыды. Сондай-ақ, Гүлнам Мұратбаева, Бота Болатбекова, Нұрай Өзбекбаева, Айда Амидуллаева, Ғалым Шадыров, Балнұр Абжанова тәрізді белсенді шәкірттер өз өнерлерін ортаға салып, көрермен көзайымына айналды.