ЖАЙДАРМАН - талай жастың шығармашылық шыңдалуына, сахнадан өзіндік орнын тауып, биік белестерден көрінуіне жол ашқан үлкен мектеп. Жайдарман ойнау арқылы көптеген қазақ жастары сахна мəдениетіне төселіп, өмірден өз орындарын тауып, əдемі əзілдерімен көпшілік көңілдерінен шығып жүр. Бұл туралы бір жолғы кездесуімізде Есен Елеукен ағамызға да арнайы алғыс етіп айтқан болатынмын. Жайдарман қозғалысын дамыту арқылы жастардың бос уақытын тиімді ұйымдастыруға, жастардың шығармашылығын дамытуға үлкен мүмкіндіктер болады. Осы ретте, үстіміздегі жылдың 3- наурыз күні Қызылорда Облысының Білім Басқармасының Қармақшы Аграрлы-техникалық Колледжі əкімшілігінің жəне Колледждегі жастар комитетінің ұйымдастыруымен "Келді көктем, нұрын төккен" тақырыбындағы жайдарман сайысы болып өтті. Сайыс ережесіне сəйкес екі кезеңнен тұратын "Jaidarman" сайысына 6 команда қатысты. Колледж директорының ауыспалы кубогін сарапқа салған додада үздіктер дараланып, 1,2,3 орындармен марапатталса, қатысқан командалар арнайы алғыс хаттарға ие болды. Үздік əзілдерімен жəне ипровизациялық өнерімен тəнті еткен студенттерден колледждің құрама командасы жасақталатын болады.