Қырағылық қырандары
ҚОҒАМДА АДАМ ТАҒДЫРЫНА ТІКЕЛЕЙ ӘСЕР ЕТЕТІН ҮШ МАМАНДЫҚ БОЛСА, СОНЫҢ БІРІ - ПОЛИЦИЯ ҚЫЗМЕТІ. ЕЛ ТЫНЫШТЫҒЫ ЖОЛЫНДА ҚЫРАНДАЙ ҚЫРАҒЫЛЫҚ КӨРСЕТІП, КҮН-ТҮНМЕН САНАСПАҒАН ТӘРТІП САҚШЫЛАРЫНЫҢ ЕҢБЕГІ ҚАШАН ДА ЗОР. ТОСЫННАН КЕЛГЕН ДАБЫЛҒА ТОСЫРҚАМАЙ КЕЗ КЕЛГЕН УАҚЫТТА САП ТҮЗЕП, ҚОҒАМДЫҚ ТӘРТІПТІ САҚТАУ МЕН АДАМ ҚҰҚЫҒЫН ҚОРҒАУ ОЛАР ҮШІН БҰЛЖЫМАС ЗАҢ. ҚОҒАМДА ҚЫЛМЫС АТАУЛЫНЫҢ ЖОЛЫН КЕСІП, ҚАТАҢ ҚАҒИДАНЫ ҚАРУ ЕТКЕН, ЖАН ТЫНЫШТЫҒЫ ДЕГЕНДІ БІЛМЕЙ ҚАЖЫРЛЫ ҚЫЗМЕТ ЕТІП КЕЛЕ ЖАТҚАН ТӘРТІП САҚШЫЛАРЫНЫҢ БАРШАСЫНА СОНДЫҚТАН ДА ҚҰРМЕТПЕН ҚАРАУҒА ТИІСПІЗ. БҮГІНДЕ АНТЫНА АДАЛ МАМАНДЫҚ ИЕЛЕРІНІҢ ҚҰРМЕТІНЕ ЖЫЛ САЙЫН 23 МАУСЫМ ҚАЗАҚСТАН ПОЛИЦИЯСЫ КҮНІ ДӘСТҮРЛІ ТҮРДЕ АТАП ӨТІЛЕДІ. СЕБЕБІ ПОЛИЦИЯ ҚЫЗМЕТКЕРЛЕРІ ЕЛДІҢ ҚАЛҚАНЫ, ХАЛЫҚТЫҢ ҚОРҒАНЫ ДЕСЕК ЕШ ҚАТЕЛЕСПЕЙМІЗ. БИЫЛ ҚАЗАҚСТАН ПОЛИЦИЯСЫНЫҢ ҚҰРЫЛҒАНЫНА 28 ЖЫЛ. МЕРЕКЕНІ АРҚАУ ЕТІП АУДАНДЫҚ ПОЛИЦИЯ ҰЖЫМЫ ЖАЙЫНДА ТІЛГЕ ТИЕК ЕТУДІ ЖӨН КӨРДІК.
Қойын дәптерімізді алып атаулы бөлімге барғанымызда кіре берістегі тәртіптің қатаң екені және оған жауапты кезекші бөлімнің сапалы қызметі сырт көзге айтпаса да көрініп тұрды. Әдетте тілші қауымның кез келген қызмет түріне сын көзбен қарайтын әдеті емес пе? Жалғыз тілші емес-ау, сырттан келген бөгде кісінің де солай жасайтыны белгілі ғой. Темір тор есіктің арғы жағынан келген жөнімізді сұраған тәртіп сақшысына әзірге оң бағамызды бердік. Тәртіпті табалдырықтан талап еткен бөлім басшысы, полиция подполковнигі Дархан Әбдібеков ұжымның ауызбіршілігін бірінші кезекке қойған. Бүгінде оның қарамағында 85 қызметкер бар. Оның ішінде 6-уы нәзік жан- дылармен толыққан. Мұндағы азанғы қызмет 7.00-де басталады. Нұсқаулық жиын өтіп, кезекшілік пысықталады. Аптаның дүйсенбі күні саптық жиын өтумен қатар қызметкерлердің жұмысқа түсу барысы тексеріліп, одан кейін мемлекеттік Әнұран шырқалады. Әрі қарай сағат 9.00-де облыс көлемінде өтетін селектрлық жиынға жалғасып, жеке құрам бойынша күндізгі нарядқа бөлініп, кент ішіндегі рейдтік шараларға кіріседі. Полиция қызметкерлерінің жұмысы оңай деуге келмейді.Өйткені оларға ең бірінші – Отан алдындығы борышы мен иығына таққан жұлдызды шеніне адал қызмет ету жүктелген. Онымен қоса қоғамдағы қылмыстың алдын алу, құқық бұзушылықты болдырмау, ел арасындағы тәртіпті ұстау міндеттелген. Олай дейтініміз – тәртіп сақшылармен бірге кент ішінде күндізгі және түнгі рейдте қатар жүріп көзімізбен көріп, жүрегімізбен де сезіндік. Тәртіпке бағынбай тәртіп сақшыларымен тәжікелесіп, жаға ұстасқанға да талай куә болдық. Кешегі елде болған төтенше жағдай кезінде де алдыңғы сапта жүріп, блок-бекеттерде табанынан тік тұрып қызмет көрсеткен де осылар. Артық мақтағанымыз емес. Десе де тәртіп сақшылары қандай да құрметке лайық.
– Бүгінгі таңда аудандық полиция бөлімінен 50 ардагер зейнетке шыққан. Оларды айтулы мерекеде және Қарттар күнінде жиі шақырып бас қосу үрдіске айналған. «Үлкендерден ақыл сұрап, олардан тәлім алу бүгінгі жас буын өкіліне қажет-ақ» дейді бөлім басшысы Дархан Темірбекұлы. Полиция мамандығы – шытырманға толы, жауапты қызмет. Қылмыс пен бетпе-бет келгенде төзімділікті талап етеді, заң бұзғанға темірдей тәртіпті үйретеді. Тәртіп бар жерде ғана тұрақтылық болатыны айтпаса да түсінікті.
Ерсін ӘБЛӘКИЕВ
