БІЗДІҢ САҚШЫ
Халықтың тыныштығы мен қоғамдық тәртіпті қадағалаудағы басты күш – құқық қорғау органдарында. Соның ішінде ішкі істер бөлімінің қырағы сақшыларының еңбегі елімізде жоғары бағаланады. Қызығы мен қиындығы қатар жүретін бұл салада шыңдалып, қоғамның әрбір мүшесі үшін өмірдің қаншалықты маңызға ие екенін жақсы білеміз.
Ел тыныштығы, тұрғындар қауіпсіздігі, қылмыскерлерді құрықтау, заңсыздықты анықтау. Осының бәрі – тәртіп сақшыларының мойнында. Ауданда қылмысты азайтып, жол-көлік оқиғаларын алдын-алуға, көшедегі келеңсіздіктер мен тәртіп бұзушылықты тізгіндеуде жол-патрульдік полицияның еңбегін атап өтпеске болмас. Осы ретте туындайтын ең басты мәселе – қоғамдық тәртіп пен қауіпсіздік.
Ал, оны қадағалайтын – тәртіп сақшылары. Солардың қатарында Мұрат Қорғанбекұлы да бар. Ол ішкі істер бөлімінде 2005 жылдан бері еңбек етіп келеді. Жемісті жұмыс істеп келе жатқан ол бүгінде ЖПҚБ ЖППт қызмет аға инспекторының міндетін атқарушы, полиция капитаны шенінде қызмет атқаруда. Жұмысына үлкен жауапкершілікпен қарайды.
Әр мамандық өзінше қызық. Дегенмен ішкі істер органы қызметінің жұмысы жауапты әрі шыдамдылықты талап етеді. Қоғамдағы тәртіп пен ел тыныштығын қорғауды мақсат еткен тәртіп сақшыларының жұмысы қиынырақ.
– Біз әрқашан халық алдындағы жауапкершілікті сезініп, ел тыныштығы мен қоғамдық тәртіпті сақтау жолында адал еңбек етуге міндеттіміз. Ішкі істер саласындағы қызмет етіп жатқан әрбір адам жұмысын жан-тәнімен сүйіп, құлшыныспен еңбек етуі керек. Осылайша біз қоғамға пайда келтіре аламыз, – дейді Мұрат Қорғанбекұлы.
Ел тыныштығын сақтау жолында қиын да қауіпті мамандықты меңгерген, қоғамдық тәртіптің қырағы сақшы өскелең ұрпаққа полиция қызметкері болу үшін қандай қағидаларды ұстану керегін жақсы біледі. Жақсылыққа ақ пейілі алып ұшып тұратын Мұрат Қорғанбекұлы секілді ер азаматтарымыздың қатары осы салада көп болса, қоғамның да сақтығы бекем болады.
Ақнұр САҒЫНТАЙ,
«Қармақшы таңы».
