Астанада еліміздің Ішкі істер министрі Қалмұханбет Қасымов тұрғындармен кездесті. Сала басшысы жұртшылықты толғандырған сауалдарға жауап беріп, қоғамдық қауіпсіздікті қорғау, құқықбұзушылықтың алдын алу, жолдағы қауіпсіздік шаралары жөнінде айтты. Ішкі істер министрі Қалмұханбет Қасымов өз сөзінде қылмыс саны өткен жылмен салыстырғанда, біршама азайғанын атап өтті. Биыл еліміз бойынша жалпы қылмыс деңгейі 12 пайызға төмендеген. Соның ішінде ауыр, орташа және аса ауыр емес қылмыс түрлері, ұрлық, бұзақылық пен зорлық саны азайған. Айта кететін мәселе, жасөспірімдер арасындағы қылмыс соңғы бес жылда тұрақты азайып келе жатыр. «Бұл тиісті ұйымдар мен мекемелердің кешенді жұмысының нәтижесінде қол жеткізген жетістік», – дейді министр. Ішкі істер министрі қылмысты болдырмау мақсатында да ұдайы жұмыстардың жүріп жатқанын тілге тиек етті.