Күніне 500 маска тігеді
Бүкіл әлемді шарпыған індет бізді де айналып өтпеді. Дәл бүгін ауданнан "аты жаман" індеттің құрығына ілінген 2 адам тіркелді. Енді сақтықты күшейтпеске болмайды. Сыртқа міндетті түрде бетпердемен шығу қажет. Барлық тұрғынға бірдей бетперде жеткілікті ме? Дәріханаға келген тауар түскен-түскеніндей өтіп кетуде. Сұранысты қанағаттандыру үшін тігіншілер қызу тірлікке кіріскен.
Солардың бірі Қайрат Мусабеков. 2019 жылдың шілдесінде кәсіпкер болып тіркеліп, тігін цехын ашу үшін "Еңбек" нәтижелі жұмыспен қамту және жаппай кәсіпкерлікті дамыту бағдарламасы шеңберінде 1,5 млн теңге несие алды. Ерлер сырт киімі мен шалбар, сөмке тігуді қолға алған кәсіпкер өткен жылы облыс әкімдігінің ұйымдастыруымен мүмкіндігі шектеулі кәсіпкерлерге арналған "Өзіңе сене баста" көрме-конкурсына қатысып бас жүлде, 1 млн теңге жеңіп алды.
Қайрат Мектепбайұлы дәл осы қысыл таяң тұста демалыссыз, үзіліссіз күніне 500 дана бетперде тігіп, дәріханаларға өткізіп отыр.
