ОЗА ШАПҚАН ШАРУАШЫЛЫҚ
Өрістің кеңеюі алға ілгерілеуді қажет етеді. Диқаншылар да бос жатқан жоқ. Күрегін алып қырманның басында тер төгіп жүр. Еңбектің наны тәтті екенін әлдеқашан түсінген ауыл тұрғыны көсегесін еселі еңбегімен көгертіп келеді. Соның бір дәлелі, жақында өткен «Қазақстанның үздік тауары» өңірлік көрме байқауында ІІІ Интернационал ауылындағы «Абай-Дәулет» ЖШС «Үздік азық-түлік тауарлары» номинациясының жеңімпазы атанды.
2016 жылы құрылған серіктестіктің басты кәсібі – күріш өндіру.Шаруашылықта заманауи, жоғары автоматтандырылған күріш зауыты бар. Бесарық пен Байтабын шаруашылығы прогрессивті технологияны пайдалану және заманауи техника арқылы еңбек өнімділігін арттыруда. Атап айтарлығы жыл сайын нарыққа шығатын өнім көлемі арта түсіп, кәсіпорында қалдықсыз өндіріс жолға қойылған. Соның нәтижесінде күріш қалдығынан жем дайындалуда.
Экспорт – ел экономикасын өсірудегі тиімді жол. Сол секілді сапа үлесі мен бәсекелестікті тудыратын оңтайлы шара. Бүгінде серіктестіктің өнімі барлық облыс пен ТМД елдеріне экспортталады. Шаруашылық күріш өндірумен бірге төрт түлік мал өсірумен де айналысады. Қылыш құйрықты қара қойды тәжікстандық тұқым түрімен будандастырып, ет бағытындағы қойға қол жеткізуде. Шаруашылықтағы қошқар салмағы 140 келіні құраса, аналығы 70-80 келіге дейін көтереді. Жылына 110-120-дан төл алынуда. Ал түйе төлі 60-қа жеткен. Одан күніне 150 литр шұбат дайындалып, облыс орталығына жөнелтіледі.
– Бүгінде жұмысшы саны – 80. Басты кәсібіміз – күріш өңдеу. Серіктестікте мал азығы қоса дайындалады. Сағатына 3 тонна өнім өндіретін шағын зауыт жұмыс істейді. Әлеуметтік жауапкершілікке баса назар аударылады. Ауылды абаттандыру, көшелерді асфальттау, әлеуметтік нысанға күрделі жөндеу жұмысын жүргізу, демалыс орнын қалыпқа келтіру секілді шаруаға да бір кісідей атсалысудамыз, – дейді кәсіпорын директоры Мұрат Абайұлы.
Айтпақшы, серіктестік спорттық-мәдени шараларға демеушілік жасап, мектепке жаңадан спорттық құрал-жабдық алып көмектескен. ІІІ Интернационал ауылында «Абай-Дәулет» ЖШС мен «Достық Жер МК» ЖШС демеушілігімен ауыл ақсақалы мен ақ жаулықты аналарына арналып киіз үй тігілді. Әр бір отбасына арзан бағада жоңышқа түсірілді. «Жастар аллеясы» бой түзеп, ауылдың ажарын айшықтай түсуде. Одан бөлек, орталық алаңда балаларға арналған батут жұмыс істеуде.
Гүлденудің сыры – бірлікте. Соның арқасында ауыл халқы елдің өрістеуіне өз үлесін қосып, жемісін бірге көруде.
Айнұр ӘЛИ
