Туберкулезден сақтанайық!

Туберкулез ауруы туралы қазіргі таңда білмейтін адам кемде-кем. Себебі, ақпарат көзі дамыған заманда, керек мәліметтерімізді интернет арқылы қолжетімді түрде ала аламыз. Инфекцияның негізгі жұғатын көзі – туберкулездің белсенді түрімен сырқаттанатын науқас адам.  Ауруға шалдыққан науқас жөтелгенде туберкулез таяқшалары бар өте ұсақ тамшылар бөліп шығарады.  Бұл таяқшалар науқас адамнан 1-1,5 метрге шашырайды. Науқаспен күн сайын тығыз қатынаста болатын адам үшін дертке оңай шалдығу қаупі басым болады. Әсіресе, нашар желдетілетін үй-жайларда: түрме камераларында, әскери казармаларда, аурухана палаталарында немесе үйде науқаспен тығыз қарым-қатынаста болатын адамдар дертке шалдығу қауіпіне жақын болады. Туберкулезбен ауыратын адамдардың көбісі зерттеу жұмыстарына қарағанда, тұрғылықты мекен-жайы жоқтар мен  қамаудағы адамдар екен. Сондықтанда кез келген дені сау адам сақтық шараларын қолданып, тұрғылықты жердегі емханаларға барып, жылына бір рет тексерістен өтіп отыруы қажет. Әрбір адам өз денсаулығына жауапкершілікпен қараса, бұл аурудың асқынуына да, таралуына да мүмкіндіктер болмас еді.