Қызылша ауруының алдын алу

Соңғы жылдары әлемнің бірқатар елдерінде қызылша ауруының тіркелу жағдайлары артып отырғаны байқалады. Осыған байланысты жұқпалы аурулардың алдын алу және халықтың санитариялық-эпидемиологиялық қауіпсіздігін қамтамасыз ету мақсатында профилактикалық шараларды күшейту аса маңызды.

Қызылша – ауа-тамшы жолы арқылы өте жылдам таралатын жіті вирустық инфекциялық ауру. Ауру көбіне қызу көтерілуімен, жалпы әлсіздікпен, жөтел, мұрыннан су ағу, көздің қызаруы сияқты белгілермен басталып, кейін денеде бөртпелер пайда болуымен сипатталады. Әсіресе екпе алмаған балалар мен иммунитеті әлсіз азаматтар арасында ауыр асқынуларға әкелуі мүмкін.

Қармақшы аудандық санитариялық-эпидемиологиялық бақылау басқармасы мамандары қызылшаның алдын алудың ең тиімді жолы – уақытылы вакцинация екенін ескертеді. Ұлттық егу күнтізбесіне сәйкес балаларға қызылшаға қарсы жоспарлы түрде екпе салынады. Вакцина ағзаның қорғаныс қабілетін күшейтіп, аурудың таралу қаупін төмендетеді.

Аурудың алдын алу үшін тұрғындарға келесі сақтық шараларын сақтау ұсынылады:

– жоспарлы екпелерді уақытында алу;

– адамдар көп жиналатын орындарда жеке гигиена талаптарын сақтау;

– жөтел немесе түшкіру кезінде ауызды жабу, қолды жиі жуу;

– қызу көтерілуі, бөртпе немесе суық тию белгілері байқалған жағдайда өздігінен емделмей, медициналық ұйымға жүгіну.

Қызылша – алдын алуға болатын инфекция. Әр азамат өз денсаулығына жауапкершілікпен қарап, вакцинациядан бас тартпай, дәрігерлердің ұсынымдарын орындаған жағдайда ғана қоғамда инфекциялық аурулардың таралуына тосқауыл қоюға болады.

Қармақшы аудандық санитариялық-эпидемиологиялық бақылау басқармасы тұрғындарды өз денсаулығына бейжай қарамауға және профилактикалық шараларды қатаң сақтауға шақырады.