Қызылша ауруының алдын алу – әр азаматтың жауапкершілігі

Қызылша – ауа-тамшылы жолмен таралатын, аса жұқпалы вирустық жұқпалы аурулардың бірі. Аурудың жылдам таралуы оның қоғам үшін қауіпті екенін көрсетеді. Қызылша көбіне егілмеген немесе иммунитеті әлсіз адамдар арасында кездесіп, ауыр асқынуларға әкелуі мүмкін.

Аурудың алғашқы белгілері дене қызуының жоғарылауымен, әлсіздікпен, жөтелмен, мұрыннан су ағумен және көздің қызаруымен байқалады. Бірнеше күннен кейін теріде қызыл түсті бөртпе пайда болады. Қызылша дер кезінде анықталып, тиісті медициналық көмек көрсетілмеген жағдайда өкпенің қабынуы, құлақтың қабынуы, жүйке жүйесінің зақымдануы сияқты ауыр асқынуларға соқтыруы мүмкін.

Қызылшаның алдын алудың ең тиімді жолы – вакцинация. Қазақстан Республикасының Ұлттық егу күнтізбесіне сәйкес, қызылшаға қарсы екпе белгіленген мерзімде жүргізіледі. Вакцина адам ағзасында тұрақты иммунитет қалыптастырып, аурудың таралуын едәуір төмендетеді.

Сонымен қатар жеке бас гигиенасын сақтау, қолды жиі жуу, тұрғын және жұмыс орындарын желдету, адамдар көп жиналатын жерлерде сақтық шараларын ұстану маңызды. Қызылша белгілері байқалған жағдайда медициналық ұйымға жедел түрде жүгініп, өздігінен ем қабылдаудан бас тарту қажет.

Инфекцияның таралуын болдырмау мақсатында науқаспен қарым-қатынасты шектеу және дәрігер нұсқауларын қатаң сақтау – қоғам қауіпсіздігін қамтамасыз етудің маңызды бөлігі. Бұл ретте халық арасында аурудың алдын алу шаралары туралы түсіндіру жұмыстарын күшейту де өзекті болып табылады.

Қызылша – алдын алуға болатын ауру. Әрбір азаматтың өз денсаулығына жауапкершілікпен қарауы, вакцинациядан уақтылы өтуі және санитариялық талаптарды сақтау арқылы ғана қоғамда жұқпалы аурулардың таралуына жол бермеуге болады.