Атақты бондиананың бір бөлімінде 007-агентті сомдаған Пирс Броснан көптен бері суретке әуес. Бұрын тек хобби болатын. Енді оған деген қатыснас өзге секілді, өйткені Пирс салған картина өте үлкен бағаға сатылды. Канн қаласында өткен amFAR бәссаудасында оның жұмысы $1,4 миллионға өтті.
Жоғары бағаланған туындыда музыкант, әдебиет саласы бойынша Нобель сыйлығының иегері Боб Дилан бейнеленген.  Осы оқиғаға байланысты актер өз инстаграм парақшасында "Бақыттан төбем көкке жеткендей болды" – деген мазмұндағы жазба арқылы өте қуанышты екенін білдірді.
Ол 1987 жылы жұбайынан қатерлі ісікті анықтаған сәттен бастап қағаз бен қылқаламды дос еткен. Бұл ермегі жанын жегідей жеген қайғыдан бір сәт арылу жолында көмек болған. Әйелі Кассандра Харрис 1991 жылы аналық без қатерлі ісігінен көз жұмған, 2013 жылы олардың қызы Шарлотта да дәл осы дерт салдарынан бақилық болды.
Пирс Броснан кино өндірістегі мансабын бастамас бұрын Сент-Мартинс дизайн мектебінде оқыған екен. "Соңғы кездері өз жұмыстарымнан көрме ұйымдастырғым келіп жүр" - дейді автор.