«НҰР ОТАН» ПАРТИЯСЫ ФИЛИАЛЫНЫҢ ҰЙЫМДАСТЫРУЫМЕН ШАҒЫН ФУТБОЛДАН ЖАРЫС БАСТАЛДЫ

Бүгін «Нұр Отан» партиясының құрылғанына 20 жыл толуына орай Қармақшы аудандық филиалының бастауыш партия ұйымдарының арасында шағын футболдан аудандық ашық біріншілік басталды.

Жарыстың ашылуында сөз алған аудан әкімінің орынбасары Қошалақов Әділ Үсенұлы биылғы жылы «Нұр Отан» партиясының 20 жылдығы мерейлі мерекесімен жұртшылықты құттықтап, жарысқа қатысушы командаларға сәттілік тіледі.

Сонымен бірге аудандық ардагерлер кеңесінің төрағасы Есдәулетов Қаршыға сөз сөйлеп, «Нұр Отан» партиясының Қармақшы аудандық филиалының шарасы жастар арасында салауатты өмір салтын қалыптастырып, бұқаралық спортты дамытудағы маңыздылығына тоқталды.

«Нұр Отан» партиясы Қармақшы аудандық филиалы мен аудандық дене шынықтыру және спорт бөлімінің ұйымдастыруымен өткізілген жарысқа 14 команда қатысып отыр.

Партия мүшелері арасында мұндай жарыстар дәстүрге айналған. Ұйымдастырушылар алдағы уақытта да спорттық сайыстарды жүйелі түрде өткізіп тұруды мақсат етеді.