СПОРТ – СЕРГЕКТІК ПЕН БІРЛІКТІҢ КЕПІЛІ
Спорт күніне орай ауданда дәстүрлі «Алтын күз – 2026» аудандық спартакиадасы ұйымдастырылды. Ауыл спортшыларының басын қосқан дүбірлі дода бұқаралық спортты дамытуға, тұрғындарды саламатты өмір салтына баулуға және жастардың спортқа деген қызығушылығын арттыруға бағытталды. Спорттық шара аудан көлеміндегі ауылдық округтер арасында өзара тәжірибе алмасып, спортшылардың шеберлігін шыңдайтын дәстүрлі жарыстардың біріне айналып келеді. Биылғы спартакиадаға ауылдық округтерден келген командалар қатысып, спорттың бірнеше түрінен бақ сынасты. Жарысқа қатысушылар өздерінің физикалық дайындығын ғана емес, ептілік, төзімділік, шапшаңдық пен жігерін де ортаға салды.
Спартакиада бағдарламасына гір тасын көтеру, асық ату, бес асық, кермеге тартылу, қол күрес және шағын футбол спорт түрлері енгізілді. Ұлттық спорт түрлерімен қатар күш пен жылдамдықты қажет ететін сайыстардың өткізілуі жарыстың мазмұнын арттыра түсті. Әр спорт түрінде қатысушылар өз командаларының намысын қорғап, жоғары нәтиже көрсетуге бар күшін салды. Әсіресе асық ату мен бес асық секілді ұлттық ойындар жастардың ептілігі мен мергендігін байқатса, гір тасын көтеру, кермеге тартылу және қол күрес спортшылардың күш-жігерін сынға салды. Ал шағын футболда командалардың ұйымшылдығы мен алаңдағы тактикалық дайындығы маңызды рөл атқарды. Мұндай жарыстардың ерекшелігі – спортшылардың жеке шеберлігін көрсетуімен қатар, командалық рухты қалыптастыруында. Әрбір қатысушы өз ауылдық округінің намысын қорғап, жеңіске жету үшін барын салды. Жарыс барысында спортшылар бір-біріне қолдау көрсетіп, жеңіске деген жігерін танытты.
Тартысты бәсекенің нәтижесінде командалық есеп бойынша Жаңажол ауылдық округінің командасы үздік нәтиже көрсетіп, І орынды иеленді. II орын Төретам кентінің командасына бұйырса, Қармақшы ауылдық округінің спортшылары ІІІ орыннан көрінді. Жеңімпаздарға үздік нәтижелері үшін марапаттар табысталып, жарысқа белсене қатысқан спортшыларға алғыс білдірілді.
«Алтын күз – 2026» спартакиадасы спорттық бәсекемен ғана шектелмей, аудан тұрғындарын бір ортаға тоғыстырған маңызды шара болды. Себебі бұқаралық спорттың дамуы – халықтың денсаулығын нығайтудың, жастардың бос уақытын тиімді ұйымдастырудың және салауатты өмір салтын қалыптастырудың бір жолы. Әсіресе ауыл жастары арасында спорттық шаралардың жиі ұйымдастырылуы олардың спортқа деген қызығушылығын арттырып, белсенді өмір салтын ұстануына мүмкіндік береді. Жарыстар арқылы жас спортшылар өз қабілетін байқап, тәжірибе жинақтайды. Сонымен бірге ауылдық округтер арасында достық қарым-қатынас пен ұйымшылдық нығая түседі.
Дәстүрлі спартакиада жоғары деңгейде өтіп, қатысушыларға көтеріңкі көңіл күй сыйлады. Жарыс алаңындағы тартыс пен жанкүйерлердің қолдауы спорттың адамдарды біріктіретін күш екенін тағы бір көрсетті.
Бауыржан ЖҮНІС
