ҰЛТТЫҚ РУХТЫ ҰЛЫҚТАҒАН ДОДА

Ауданымызда қазақтың төл спорты – қазақ күресінен 2011–2012 жылы туған кіші жасөспірімдер арасындағы облыс біріншілігі бастау алды. Ұлттық спортты ұлықтауға бағытталған бұл маңызды жарыс жыл сайын дәстүрлі түрде ұйымдастырылып келеді.

Биылғы додаға Сыр елінің 7 ауданынан 18 команда қатысып, 170-ке жуық жас спортшы бақ сынауда. Екі күнге жоспарланған жарыс 17–18 наурыз аралығында жалғасады.

Жарыстың ашылу салтанатына аудан әкімінің орынбасары Диас Молдабаев қатысып, қазақ күресінің маңызын атап өтті:

«Қазақ күресі – халқымыздың ұлттық рухын көрсететін ерекше спорт түрі. Бүгінгі жарыстың Ұлыстың ұлы күнімен қатар өтуі – оның мәнін одан әрі арттыра түседі. Жастардың спортқа деген қызығушылығы мен салауатты өмір салтын таңдауы – еліміздің жарқын болашағының кепілі. Барша жас спортшыларға сәттілік пен жарқын жеңістер тілеймін», – деді.

Сонымен қатар жарыстың жоғары деңгейде өтуіне үлес қосып отырған ұйымдастырушыларға, бапкерлер мен спорт жанашырларына алғысын білдірді.

Айта кетейік, жарыс қорытындысы бойынша анықталған жеңімпаз жүлдегерлер Қазақстан Республикасының чемпионатына жолдама алатын болады.

Қармақшы ауданы әкімінің баспасөз қызметі